Lideri i Lëvizjes Vetëvendosje (LV), Albin Kurti, ka thënë se mosndryshimi i Serbisë është problemi kryesor i Ballkanit.

Ai ka thënë se Serbia po vazhdon t’i mbajë gjallë problemet e vjetra.

 Ndonëse janë bërë dy dekada nga mbarimi i luftës dhe një dekadë nga pavarësia, Kurti ka rikujtuar se ende nuk ka drejtësi për viktimat, Serbia nuk e njeh pavarësinë e Kosovës, nuk i pranon krimet që i ka kryer mbi shqiptarët dhe nuk i paguan dëmet e shkaktuara gjatë okupimit dhe luftës.

“Mosndryshimi i Serbisë është problemi kryesor i Ballkanit, sepse po i mban gjallë problemet e vjetra. Mbase e vetmja gjë e re është që tash Kosova ka një president anti-historik i cili don pajtim historik me Serbinë e vjetër”, ka shkruar Kurti në llogarinë e vet në “Facebook”.

 Postimi i plotë i tij:

18 vjet më parë, me 5 tetor, në pavilonin VI të burgut të Pozharevcit u ndal energjia elektrike. Në radioaparate me bateri, lajmet i dëgjonin vetëm rojet e brengosura të këtij burgu i cili ndodhej në vendlindjen e Milosheviqit.

Mirëpo, të nesërmen s’mbahej më dot fshehtë se mbrëmë qenka rrëzuar Milosheviqi. Më 5 tetor 2000, tankset e ushtrisë dhe autoblindat e policisë vendosën të mos shtiejnë mbi popullin që kishte mbushur sheshet dhe rrugët e Beogradit. Krerët e opozitës kishin bërë marrëveshje xhentëlmene me gjeneralët kryesorë të forcave të armatosura. Rezultati i zgjedhjeve të manipuluara u përmbys dhe fitues i zgjedhjeve u shpall Koshtunica, i cili akuzonte Milosheviqin për humbjet (e Serbisë) jo për krimet (ndaj joserbëve). Fort ngjashëm si Vuçiq në Mitrovicë para katër javësh.

Sa ishte gjallë Milosheviqi, u vra ish kryeministri serb Gjingjiq në mars 2003, kurse vetë ky vdiq në burgun e Hagës në mars 2006 pa u dënuar për së gjalli.

Mbi 150 mijë joserbë u vranë nga forcat serbe përgjatë katër luftërave të viteve të ’90-a teksa po shpërbëhej ish Jugosllavia. Por, më pak se 250 kriminelë serbë gjithsej përfunduan prapa grilave të burgjeve në Hagë e në Serbi.

Përveçse nuk pati drejtësi për viktimat, Serbia nuk e njeh pavarësinë e Kosovës, nuk i pranon krimet që i ka kryer mbi shqiptarët dhe nuk i paguan dëmet e shkaktuara gjatë okupimit dhe luftës. Paçka se janë bërë dy dekada nga mbarimi i luftës ndërsa pavarësia i mbushi një dekadë.

Mosndryshimi i Serbisë është problemi kryesor i Ballkanit, sepse po i mban gjallë problemet e vjetra. Mbase e vetmja gjë e re është që tash Kosova ka një president anti-historik i cili don pajtim historik me Serbinë e vjetër.

/Epoka e re/