Kryeministri Albin Kurti, bashkë me ministren e Arsimit, Shkencës, Teknologjisë dhe Inovacionit, Arbërie Nagavci dhe kryesuesin e Komisionit Qeveritar për Personat e Zhdukur, Andin Hoti, kanë marrë pjesë të premten në përurimin e Shkollës së re Fillore dhe të Mesme të Ulët “Bajram Curri”, në Krushë të Madhe, e që përkon me ditën e kësaj shkolle.

Duke e konsideruar këtë si festë të dyfishtë, Kurti ka thënë se në Krushën e Madhe të dhimbjes së madhe, “sot po i bashkon gëzimi”.

“Fëmijët e lindur në liri, po festojnë të lirë. Kjo shkollë e mban emrin e një atdhetari tonë të madh, të lindur këtu, në Krushë të Madhe, pra Bajram Currit, të cilit në vitin që shkoi e kishim 160-vjetorin e lindjes. Si veprimtar i çështjes sonë kombëtare që u angazhua edhe për shkollën shqipe, duke ndihmuar për themelimin e klubeve e shkollave shqipe në Kosovë dhe duke mbrojtur alfabetin e gjuhës shqipe të vendosur në Kongresin e Manastirit. E sot, bashkë po përurojmë një shkollë të re në vendlindjen e tij të dashur për të gjithë neve”, ka thënë Kurti.

Para të pranishmëve, Kurti, duke thënë se ndihet i lumtur që po merr pjesë në hapjen e shkollës së re, e ka quajtur këtë “një dëshmi e vendosmërisë së tyre të palëkundur, për të rindërtuar jetën, për të ndërtuar një të ardhme më të ndritur për të vegjlit e të rinjtë e Krushës së Madhe”.

“Në këtë vend që pa shumë shkatërrim, sot po hapim dyert e një ndërtese të re shkollore”, ka thënë ai, duke shtuar se arsimi cilësor është baza më e qëndrueshme për prosperitet për të ardhmen.

“Për ta ngritur cilësinë dhe për të përmirësuar kushtet arsimore, e kemi rritur buxhetin e arsimit edhe në këtë vit. Tanimë janë siguruar 18 milionë euro për investime fillestare për vitet e ardhshme në teknologjinë e informacionit dhe komunikimit në infrastrukturën përkatëse në shkolla”, ka thënë ai.

Më tutje, Kurti ka thënë se me strategjinë qeverisëse për arsimin, të miratuar nga qeveria e tij për periudhën 2022-2026, parashihen investime domethënëse në fushën e edukimit në fëmijërinë e hershme dhe teknologji të informacionit e të komunikimit.

Objekti i ri i shkollës ka një sipërfaqe prej rreth 5000 m², me 23 klasa mësimi, 2 dhoma për nxënësit parafillor me hyrje të veçantë, laboratorin, bibliotekën, dhomat e leximit dhe klasën e informatikës, të pajisura me inventar bashkëkohor.