Zyra e kryeministrit ka njoftuar se Albin Kurti, ka  nisur takimet me partitë e komuniteteve për konsultime në lidhje me formimin e qeverisë.

Ai është takuar me Emilija Rexhepin, që aktualisht është zëvendëskryeministre e tretë dhe kryetare e NDS-së.

Sipas njoftimit të zyrës së kryeministrit Rexhepi e ka “konfirmuar gatishmërinë e plotë për vazhdim të bashkëpunimit me Lëvizjen Vetëvendosje si fituese e zgjedhjeve të fundit dhe mbështetjes së kryeministrit Kurti në formimin e qeverisë së re”.

Njoftimi i plotë:

Kryeministri i Republikës së Kosovës, Albin Kurti, ka filluar takimet me partitë politike të pakicave, për konsultim me to në lidhje me formimin e qeverisë së re pas certifikimit të rezultatit të zgjedhjeve të 9 shkurtit dhe fillimit të afateve kushtetuese drejt formimit të legjislaturës dhe qeverisë së re.

Në kuadër të këtyre diskutimeve, kryeministri u takua me zëvendëskryeministren e tretë për Çështje të Pakicave dhe të Drejtat e Njeriut dhe kryetaren e Partia e Re Demokratike (NDS), Emilija Rexhepi. Ajo e konfirmoi gatishmërinë e plotë për vazhdim të bashkëpunimit me Lëvizjen Vetëvendosje! si fituese e zgjedhjeve të fundit dhe mbështetjes së kryeministrit Kurti në formimin e qeverisë së re.

Kryeministri Kurti e falënderoi znj. Rexhepi për bashkëpunimin e frytshëm, rezultatet e arritura gjatë këtij mandati dhe punët e mbara që na presin në katërvjeçarin e ardhshëm.