Kryeministri Albin Kurti, ka deklaruar të martën se Kosova duhet të ketë një strategji të energjisë të koordinuar mirë me të gjithë akterët vendorë dhe ndërkombëtarë, e cila sipas tij do të rezultonte me rritjen e standardit të jetesës për të gjithë qytetarët e vendit.

Kurti në hapje të punëtorisë “Tranzicioni i drejtë energjetik në Kosovë”, të organizuar nga Ministria e Ekonomisë, ka thënë se me implementimin e strategjisë së energjisë pritet të krijohen vende të reja të punës dhe të krijohen hapësira për investime.

“Si shtet e si vend jemi në vitin kur pritet të merren vendime të rëndësishme në sektorin e energjisë, vendime të cilat do ta definojnë këtë sektor jo vetëm për 10 vitet e ardhshme, por edhe më tej se aq. Kosova është në fazën e rishikimit të strategjisë së energjisë, hartimit të planit për energji dhe klimë si dhe rishikimit të legjislacionit në fushën e energjisë. Të gjitha këto nisma do të definojnë synimet tona. Qëllimi ynë është që strategjia e energjisë të jetë mirë e informuar, e zbatueshme dhe me objektiva të sakta dhe të matshme. Kosova nuk duhet të ketë një strategji vetëm qe të përmbushë kriteret legjislative, mirëpo një strategji e koordinuar mirë me të gjithë akterët vendorë dhe ndërkombëtarë, që rezulton në rritjen e standardeve të jetesës për të gjithë qytetarët e Kosovës. Meqë jemi në shërbim të qytetarëve, pritet që kjo strategji me implementim të krijojë vende të shumta pune, hapësirë për investime duke lehtësuar proceset, të aktivizojë shoqërinë përmes pjesëmarrjes së qytetarëve në vendimmarrje si dhe të krijojë mundësi përfitimi për ta”,  ka thënë Kurti.

Ndërsa ministrja e Ekonomisë, Artane Rizvanolli, ka thënë se një tranzicion i drejtë dhe i mbështetur nga të gjithë akterët është çelësi për ta bërë një tranzicion të përballueshëm për qeverinë, qytetarët dhe vet ekonominë e Kosovës.

Rizvanolli  ka theksuar se sfidat e sektorit energjetik në Kosovë janë te shumta, teksa ka numëruar disa prej tyre.

“Investimet në këtë sektor jo vetëm që kërkojnë fonde e kohë, por duhet të jenë mirë të planifikuara. Një tranzicion i drejtë dhe i mbështetur nga të gjithë akterët është çelësi për ta bërë një tranzicion të përballueshëm për qeverinë, qytetarët dhe vet ekonominë e Kosovës. Prandaj, për zhvillimin e një politike të qëndrueshme energjetike në vendin tonë është qenësore që të identifikojmë skenarët e duhur për një tranzicion energjetik dhe analiza e tyre kritike duke u bazuar në përputhshmërinë, sigurinë dhe qëndrueshmërinë e furnizimit me energji si dhe qëndrueshmërinë dhe përballueshmërinë financiare”,  ka thënë Rizvanolli.

Punëtoria “Tranzicioni i drejtë energjetik në Kosovë” për sektorin e energjisë dhe koordinimin e donatorëve në Kosovë ka për qëllim informimin e vendimeve teknike dhe politike që do të merren gjatë procesit të finalizimit të strategjisë kombëtare të energjisë.