Menjëherë pas zgjedhjes në krye të qeverisë, Albin Kurti është betuar dhe më pas ka mbajtur një fjalim para deputetëve.

Kurti ka thënë se nga sot fillon një kapitull i ri për Kosovën.

“Me krijimin e qeverisë po jetësojmë edhe vullnetin e qytetarëve që e dhanë në zgjedhjet e 6 tetorit. Sot, nuk ka fituar Lëvizja Vetëvendosje e Lidhja Demokratike e Kosovës, sot kanë fituar qytetarët e Kosovës. Unë zotohem se do të angazhohem maksimalisht për të mirën e gjithë qytetarëve. Sot fillon rruga jonë e punës së madhe dhe të palodhshme. Sot mbaron rruga e vjetër e klientelizmit dhe e pabarazisë. Nga sot ka një lidership te ri që do të kujdeset për shtetin. Sot fillon edhe një kapitull i ri për politiken e jashtme”, ka thënë Kurti pas zgjedhjes së tij kryeministër.

Qeverinë e udhëhequr nga Kurti e kanë mbështetur 66 deputetë, ndërsa ka pasur 10 abstenime dhe asnjë kundër.

Pak para votimit, partitë politike opozitare PDK-ja, AAK-ja dhe Nisma kanë lëshuar sallën e Kuvendit.

Ndërkaq dy deputetët e AKR-së kanë votuar për formimin e qeverisë.