Kryeministri i Kosovës, Albin Kurti, ka thënë se institucionet e Kosovës i kanë mundësitë të kufizuara që të ndikojnë në Gjykatën Speciale në Hagë.

Duke komentuar vendimin për ndalimin e vizitave dhe telefonave për krerët e UÇK-së, ai ka thënë se ndikimi i tyre është tejet i vogël.

Por, ai ka thënë se së bashku me kryetarin e Kuvendit, Glauk Konjufca, janë duke punuar në këtë drejtim.

“Sigurisht që bëhet fjalë për zhvillim negativ meqenëse e pësojnë familjet më të dashurit e atyre që po mbahen mbi 3 vjet në Hagë”.

“Unë këtë dje e kam marr vesh nga deputetja Shqipe Selimi që është bashkëshortja e gjeneralit të UÇK-së Rexhep Selimi dhe njëkohësisht e kemi diskutuar edhe me kryetarin e Kuvendit Glauk Konjufcën, këtë zhvillim negativ. Ju e dini që ne i kemi mundësitë e kufizuara për të pasur çfarëdo ndikimi mirëpo natyrisht jemi duke menduar se si mund të ndihmojmë”, ka thënë Kurti.

Gjykata Speciale e Hagës, më saktësisht Qendra e Paraburgimit, i ka ndaluar të gjitha telefonatat dhe vizitat për krerët e UÇK-së.

Atyre vetëm u është thënë se “me keqardhje i njoftojnë që vizitat janë anuluar”. As familjarët e as miqtë nuk kishin pranuar asnjë sqarim tjetër.

Ata që kishin vizita të aranzhuara kishin paguar biletat e hotelet, dhe kishin kryer fluturimet. Por, në fund, vizita nuk është bërë.

Arsyet pse ka ndodhur një situatë e tillë ende nuk dihen. Megjithatë, kjo vjen disa ditë pasi Prokuroria e Hagës pati disa aksione, arrestime e bastisje, me arsyetimin e “pengimit të drejtësisë”. Por, nuk dihet nëse ndalesa e vizitave e telefonatave ndërlidhet diçka me këtë qëllim. /EO