Kryeministri i Kosovës Albin Kurti, në një intervistë për agjencinë e lajmeve austriake APA ka folur edhe për propozimin franko-gjerman për arritjen e  një marrëveshje në mes të Kosovës dhe Serbisë.

Kurti ka thënë se është një bazë e mirë për dialog pa hyrë në detaje të një propozimi të tillë.

Ai ka thënë se e mira e një propozimi të tillë është se bazohet në vlera dhe jo vetëm në zgjidhjen e problemeve siç ka qenë qasja e mëparshme.

Megjithatë, Kurti ka theksuar se propozimi franko-gjerman “ka shumë mangësi”, por ka shtuar se është një pikënisje e mirë.

Më tutje, ai ka folur edhe për mundësinë e arritjes së një marrëveshje finale me Serbinë dhe është shprehur optimist se shanset janë shumë të mira që ajo të arrihet përgjatë administratës së Joe Bidenit dhe kancelarit gjerman, Olaf Scholz.

“Njohja reciproke nuk do të jetë e vetmja çështje, por ajo duhet të jetë pjesa qendrore”, ka deklaruar kryeministri Kurti.

Në këtë intervistë, Kurti ka treguar synimin e Kosovës për të dorëzuar aplikimin për anëtarësim në BE kah fundi i këtij viti.

“Ne duam të tregojmë publikisht që duam të bashkohemi në BE”, ka thënë kryeministri Kurti.