Kryeministri i Kosovës, Albin Kurti, ka thënë se po përgatisin një masë për t’u dalë në ndihmë një shtrese të konsumatorëve shtëpiakë.

Duke folur në Kuvend për situatën energjetike dhe paralajmërimin për një krizë të re, Kurti ka thënë se përmes subvencionimit të disa konsumatorëve, synojnë ta ulin shpenzimin e energjisë elektrike. Ai i është përgjigjur pyetjes së deputetes Hykmete Bajrami nëse do të ketë sërish shtrenjtim të rrymës.

“Ministria është duke e përgatitur edhe një masë për efiçiencë të energjisë për konsumatorët shtëpiakë. Përmes subvencioneve, do të ndihmohen konsumatorët që të ulin shpenzimet e energjisë elektrike. Ndihma më e madhe do të koncentrohet te rastet e skemës sociale dhe te rastet që janë në nevojë, por s’janë të përfshirë në skemën sociale”, ka thënë ai.

Kurti ka thënë se aktualisht, në termocentralin “Kosova B” janë në remont kapacitetet gjeneruese. Ai ka thënë se kështu po përgatiten për sezonin e dimrit.

“Kapacitetet gjeneruese të termocentraleve gjatë sezonës së verës janë në remont të rregullt te ne. Njëri bllok i Kosovës B është në remont të rregullt dhe pritet të përfundojë gjatë këtij muaji, ndërsa blloku tjetër i Kosovës B do të hyjë në remont gjatë muajit gusht dhe do të zgjasë rreth 25 ditë”, ka thënë ai.

Kurti ka thënë se do të ketë remont të rregullt jashtë dimrit edhe në termocentralin “Kosova A”.