Presidenti i Serbisë, Aleksandar Vuçiq, është shprehur i sigurt që kryeministri i Kosovës, Albin Kurti, nuk do ta themelojë Asociacionin e Komunave me Shumicë Serbe.

Ai, duke folur për mediet serbe, ka thënë se nuk e ka këtë pritje.

Vuçiqi ka thënë se në Kosovë politikanët merren me politika ditore prandaj, sipas tij, është Serbia që duhet t’i bëjë vendimet.

Për këtë arsye, ka thënë ai, është gati se i bindur që Kurti nuk do ta themelojë ASK-në në të ardhmen.

“A do të jetë një muaj, dy apo gjashtë, por dikush do të duhet ta themelojë atë, e më pas topi është te ne për diskutime të tjera”, ka thënë Vuçiq.

Sipas Vuçiqit, Kurti ka thënë se ai nuk mund t’i pranojë obligimet që ka marrë përsipër një qeveri kriminale, duke e pasur fjalën për qeveritë pararendëse në Kosovë.

Ai ka thënë se nuk kanë arritur pajtim në Bruskel gjatë takimit të djeshëm me Kurtin.