Kryeministri i Kosovës, Albin Kurti, ka njoftuar se i ka dërguar letër sqaruese kancelarit gjerman, Olaf Scholz, presidentit francez, Emmanuel Macron, kryeministres së Italisë, Giorgia Meloni, dhe sekretarit të ShBA-së Antony Blinken, në lidhje me takimin e 14 shkurtit në Bruksel.

Ai ka thënë se nga Parisi dhe Berlini ka marrë konfirmim se i kanë pranuar këto letra, ndërsa ka thënë se “një emisar ka deformuar procesin”, duke iu referuar Mirosllav Lajçakut.

“Së pari, unë të nesërmen, më 15 shtator, i kam dërguar letër sqaruese Parisit, Berlinit, Romës dhe Uashingtonit. Nga Parisi dhe Berlini e kanë konfirmuar që i kanë pranuar. Pra i kam dërguar letër kancelarit Scholz, presidentit Macron, kryeministres Meloni dhe sekretarit Blinken. Këtu kemi të bëjmë me një emisar që e ka deformuar procesin, duke mos u përqendruar në zbatimin e plotë të marrëveshjes bazike, por duke lejuar që qerrja të vihet para kalit, që Asociacioni njëherë e pastaj shohim. Dhe ky deformim i procesit i zbatimit është i shoqëruar edhe me një padrejtësi fundamentale”, ka thënë Kurti të hënën në një konferencë për medie.