Me 25 vota për, as një kudër dhe një abstenim Kuvendi Komunal i Prishtinës ka votuar për shkarkimin e 20 aksionarëve të dhjetë ndërmarrjeve publike komunale.

Në mbledhjen e jashtëzakonshme të Kuvendit Komunal nuk kanë marrë pjesë asamblistët e LDK-së dhe PDK-së. Mbledhja është thirrur nga Lëvizja Vetëvendosje dhe AAK-ja.

Emrat e të gjithë aksionarëve të shkarkuar:

Jeta Hasani-Rafuna dhe Milazim Vitia – Ngrohtorja e qytetit “Termokos”,

Leutrim Retkoceri dhe Granit Geci – Ndërmarrja Publike Banesore,

Muhamet Selmani dhe Shegë Beqiri – Kompania Rajonale e Mbeturinave “Pastrimi”,

Kumrie Shabani-Ramadani dhe Arbnore Ajeti – Ndërmarrja Publike “Hortikultura”,

Agron Canolli dhe Fatmir Dervishi – Ndërmarrja Publike “Trafiku Urban”,

Pëllumb Bajqinovci dhe Elmira Nikçi-Rexha – Ndërmarrja Publike “Sport Marketing”,

Donjeta Dragusha, dhe Amir Simica; – Ndërmarrja Publike “Stacioni i Autobusave”,

Lindita Rexhepi dhe Samir Salihu – Ndërmarrja Publike “Prishtina Parking”,

Dasmor Durmishi dhe Agim Kuleta – Ndërmarrja Publike “Kuzhina Qendrore”,

Dhurata Ratkoceri dhe Fitnete Bejta – Ndërmarrja Publike “Pallati i Rinisë”.

Në media ditëve të fundit është raportuar se zhvillimet e ditës së sotme rrezikojnë ta shpërbëjnë përfundimisht koalicionin, tashmë të lëkundur në mes të LDK-së dhe PDK-së. Sherri mes dy partive në pushtet komunal ka të bëjë me mosmbështetjen e PDK-së për hartat zonale.

Kryetari i komunës së Prishtinës, qysh në shtatorin e vitit të kaluar kishte miratuar vendimin për formimin e një komiteti konsultativ për Hartimin e Planit Zhvillimor dhe hartës zonale.

Ky plan, që orienton zhvillimin e kryeqytetit do të ishte tetëvjeçar. Deri tash, nuk dihet saktë se cilat ishin mospajtimet specifike mes palëve, por dihet që PDK-ja nuk po pajtohet.