Kuvendi i Kosovës sot do të mbajë një seancë të jashtëzakonshme për ta trajtuar problemin e furnizimit me ushqim për Forcën e Sigurisë së Kosovës.

Seanca është thirrur me kërkesë të grupit parlamentar të Aleancës për Ardhmërinë e Kosovës (AAK), e mbështetur nga 43 deputetë nënshkrues.

Shefi i grupit parlamentar të AAK-së, Besnik Tahiri, ka bërë me dije dje se do të propozohet një rezolutë e thjeshtë që obligon Qeverinë dhe Ministrinë e Mbrojtjes të zgjidhin urgjentisht çështjen e furnizimit me ushqim dhe pajisje të tjera të nevojshme për ushtrinë.

“Kuvendi do të obligojë qeverinë të zgjidhë këtë çështje”, ka shkruar Tahiri në Facebook.

Ai ka shtuar se drafti i rezolutës mund të plotësohet nga deputetët gjatë seancës, duke lënë hapësirë për diskutim dhe përmirësime të mundshme.