![](https://www.epokaere.com/wp-content/uploads/2018/09/veriu.jpg)
Kuvendi voton për ndarjen e 11 milionë eurove për rrymën në veri
Deputetët e Kuvendit të Kosovës, me 61 vota për kanë miratuar të enjten rekomandimet e Komisionit për Ekonomi, Industri, Ndërmarrësi dhe Tregti lidhur me propozimin që Operatori i Sistemit, Transmisionit dhe Tregut të energjisë elektrike të Kosovës (KOSTT) të marrë përgjegjësinë për pagesën e rrymës për serbët në katër komunat veriore. Sipas këtij vendimi, për këto komuna në veri të Kosovës janë ndarë 11 milionë euro për pagesën e rrymës. Ndërkaq, në këtë votim nuk kanë marrë pjesë deputetët e PDK-së, LDK-së dhe të AAK-së, të cilët e kanë lëshuar seancën.
Javën e kaluar Komisioni për Ekonomi, Industri, Ndërmarrësi dhe Tregti, ka miratuar propozimin e KOSTT-it për ndarjen e këtyre mjeteve. Pas këtij vendimi, i menjëhershëm kishte qenë reagimi i opozitës.
Partia Demokratike e Kosovës ka akuzuar Qeverinë Kurti se në kundërshtim me zotimet e saj ka miratuar këtë vendim, duke shtuar se e njëjta qeveri kishte anuluar shtesat prej 30 euro për pensionistët.
Ndërkaq përfaqësuesit e Lidhjes Demokratike të Kosovës kanë thënë se Qeveria Kurti është duke ndërmarrë veprime të cilat i kishte kundërshtuar si opozitë.
Ndërsa në reagimin e Aleancës për Ardhmërinë e Kosovës thuhet se 11 milionë euro është shuma të cilën duhet ta paguajnë shumica e qytetarëve të Kosovës, për një pakicë e cila në bashkëpunim me Serbinë, sfidon institucionet e republikës së Kosovës.