Sot është raportuar ekskluzivisht se shtëpia e një zyrtarit të AKI-së, në Prizren, ka qenë cak i hajnave. Ai dyshohet se dje në mesditë vodhi armën zyrtare dhe dokumentet personale të punonjësit të agjencisë së inteligjencës kosovare.

Sinjali mëson ekskluzivisht se i dyshuari është: Menderes Kadri, i lindur më 1991.

Ky i fundit pas një bashkëpunimi të ngushtë të institucioneve të sigurisë, është arrestuar sot në mesditë.

Ndalimin e tij e ka konfirmuar edhe Policia në Prizren.

“Pas disa veprimeve operative-hetimore hetuesit e Sektorit Rajonal të Hetimeve të Drejtorisë Rajonale të Prizrenit kanë arrit që të identifikojnë dhe arrestojnë të dyshuarin, për të cilin dyshohet se dje ka hyrë në shtëpinë e një zyrtari në Prizren, dhe ka vjedhur armën zyrtare dhe disa dokumente personale”.

“I dyshuari është intervistuar dhe ka pranuar veprën. Disa nga gjësendet e vjedhura janë gjet ndërsa arma ende është duke u kërkuar nga hetuesit”, thuhet në konfirmimin e policisë prizrenase.

Si ndodhi rasti?

Sinjali ka raportuar ekskluzivisht se rasti që ndodhi dje pasdite është denoncuar nga vet zyrtari, i cili ka raportuar në Polici se një person i është futur në shtëpi në orët e pasdites dhe dyshohet se ia ka vjedhur një çantë.

Sipas informacioneve të para që ka Sinjali, në çantën që e vodhi hajni ishte arma zyrtare, dokumente personale, ndër të tjera edhe ID-ja e viktimës si zyrtar i AKI-së.

Policia është njoftuar menjëherë dhe si rezultat, njësitë përkatëse kanë dalë në vendin e ngjarjes, ku janë kryer procedurat e nevojshme.

Pas intervistimit, me vendim të Prokurorit i dyshuari është ndaluar për 48 orë.