Senatorët amerikanë, republikani Ron Johnson dhe demokrati Chris Murphy, kanë vizituar të mërkurën Kosovën.

Gjatë deklarimit të tyre përpara medieve, ata kanë thënë se janë këtu që ta përkrahin popullin e Kosovës dhe atë të Serbisë.

“Ne jemi këtu të japin përkrahjen tonë për këtë vend për ketë regjion. Arritja e një marrëveshje në mes të Kosovës dhe Serbisë është çelësi i arritjes së një prosperiteti për qytetarët e të dyja vendeve”, tha senatori Ron Johnson.

Ndërsa senatori demokrat, Chris Murphy, ka kërkuar që të vazhdojë dialogu në mes të Kosovës dhe Serbisë.

“Sa i përket dialogut duhet të vazhdojë dialogu dhe të marrin vendime të vështira. Duhet që ky dialog të ketë kuptim dhe në të mirën e të dy shteteve. Ne do ta vazhdojmë udhëtimin tonë edhe në Serbi dhe atje do t’i themi edhe Vuçiqit të njëjtën gjë. Duhet të rregullohen marrëdhëniet ndërmjet këtyre dy nacionaliteteve sepse kjo është e mira për të dy shtetet, që të jenë në gjendje edhe ta rrisin ekonominë e tyre”, ka thënë senatori Murphy.

Senatorët amerikanë kanë inkurajuar qytetarët e Kosovës që të dalin masovisht në zgjedhjet e 6 tetorit.

Paraprakisht senatorët amerikanë janë takuar me Albin Kurti, Shpend Ahmetin, Behgjet Pacollin, Ramush Haradinajn dhe Isa Mustafën, si dhe pjesëtarët e shoqërisë civile.