Bashkimi Evropian (BE) ka ftuar për përmbajtje Prishtinën dhe Beogradin pas operacioneve të Policisë së Kosovës me kërkesë të organeve të drejtësisë.

Maja Kocijançiq, zëdhënëse në BE-së, në një reagim për medie, ka thënë se “sigurimi i sundimit të ligjit, përfshirë edhe presupozimin e pafajësisë, është një objektiv që BE-ja fuqishëm e mbështetë”.

“Operacionet e policisë duhet të sjellin besim në sundimin e ligjit për të gjitha komunitetet. Operacionet e tilla duhet të riforcojnë e jo të dobësojnë përpjekjet për normalizim”, ka thënë ajo.

Kociançiqi ka thënë se “besojnë fuqishëm se më shumë bashkëpunim policor dhe gjyqësor është i nevojshëm për të gjithë aktorët duke respektuar në tërësi marrëveshjen e Brukselit”.

“Operacioni policor në Mitrovicë i drejtuar ndaj të dyshuarve individualë nga i tërë rajoni dhe nga pjesët tjera të Kosovës, duke ndjekur urdhrat e Gjykatës, duhet të zbatohet në përputhje me ligjin dhe të komunikohet në mënyrë të duhur. Ne jemi në kontakt me lidershipin në Prishtinë dhe Beograd dhe kemi bërë thirrje për përmbajtje maksimale” , është thënë në reagimin e Kociançiqit.

Më parë Bashkimi Evropian po ashtu ka tërhequr vërejtjen për nivelin e lartë të krimit të organizuar në Kosovë, por edhe në vendet tjera të rajonit.