Dje në mesditë ka ndodhur një aksident i rëndë trafiku në Veternik të Prishtinës, ku një kamion del nga korsia e tij, thyen anësoret e rrugës dhe godet 11 vetura.

Si pasojë e këtij aksidenti 11 persona kanë mbetur të lënduar, ku gjashtë nga ta po trajtohen në QKUK.

Sinjali ka mësuar ekskluzivisht edhe emrin e shoferit që shkaktoi aksidentin e rëndë e që bëhet fjalë për Emin Morinën – që tashmë është arrestuar nga Policia e Kosovës.

Lajmin për aksidentin e rëndë e konfirmoi edhe zëdhënësja e Policisë për rajonin e Prishtinës, Flora Ahmeti, ku tha se 11 vetura u përfshinë e u lënduan 11 persona.

“Sot rreth orës 14:30 kemi pranuar informatën se në Veternik ka ndodhë një aksident trafiku. Në këtë aksident kanë qenë të përfshirë një kamion dhe 11 automjete. Bazuar në të dhënat e deritanishme, si pasojë e aksidentit lëndime trupore kanë pësuar 11 persona”, ka thënë ajo.
Ndërkaq, si shkak i këtij aksidenti rruga për Veternik dje ka mbetur e bllokuar me orë të tëra nga kolonat që u krijuan.