Para rreth një jave, Agim Veliu  është shkarkuar nga pozita e kryetarit të Degës së Lidhjes Demokratike të Kosovës (LDK) në Podujevë. Partia që udhëhiqet nga Lumir Abdixhiku ka venduar që kompetencat në këtë komunë t’ia bartë kandidatit për kryetar komune, Ekrem Hysenit.

Në media sot është publikuar edhe vendimi i Kryesisë për shkarkimin e Veliut nga pozita e kryetarit të degës dhe bartjen e kompetencave te Hyseni.

Në pikën e pestë të këtij vendimi është thënë se “si pjesë riorganizimit të brendshëm, të prezantuar në platformën e kryetarit të LDK-së 2021-2023, të miratuar në Këshill të Përgjithshëm merren këto hapa organizativ: a) të gjitha kompetencat e udhëheqjes së degës së LDK-së në Podujevë, i kalojnë kandidatit të LDK-së. Kandidati udhëheqë me Kryesinë e degës, zyrën e degës dhe bashkërendon aktivitetet me kryetarët e nëndegëve në Komunën e Podujevës; b) Pas procesit zgjedhor, Kryesia do të nxjerrë një vendim të ri në lidhje me organizimin e degës, në përputhje me Platformën e kryetarit të LDK-së dhe procedurat e parapara statutore”, është thënë në vendimin e LDK-së.

Ndryshe, pas këtij vendimi kishte reaguar vetë Veliu, i cili kishte thënë se në LDK kanë marrë një vendim ilegal kundër tij.