Kyçjet ilegale në rrjetin e energjisë elektrike bënë që shpesh here të dalin problem të paparashikuara dhe të lënë pa rrymë konsumatorët e energjisë elektrike.

Rasti i fundit i kyçjes ilegale në sistemin e energjisë elektrike, ishte para dy ditë në Podujevë, ku nga kyçja ilegale në sistem u dogjën njehsorët për matjen e energjisë elektrike. Nga djegia u shkaktuan dëme të mëdha dhe mbi 1200 konsumatorë të KEDS-it mbetën pa energji elektrike.

Zëdhënësi i KEDS-it, Viktor Buzhala bëri me dije për RTK live se rasti i kyçjes në Podujevë është eklatant dhe totalisht i papranueshëm.

“Dy konsumatorë të shkyçur për borxhe në tentim që të bëjnë ri-kyçje, kanë shkaktuar djegien e njehsorëve. Si pasojë, janë goditur edhe konsumatorët tjerë. Kjo, pasi KEDS është detyruar që për shkaqe të sigurisë, deri në evitimin e rrezikut ta ndërpresë energjinë elektrike në atë pjesë për 1200 konsumatorë”, ka thënë Buzhala.

Sipas tij fatkeqësisht, këto raste nuk janë të rralla. “Veprime të tilla nuk guxojnë të ndodhin assesi. Pos afektimit të konsumatorëve të rregullt, të cilët e pësojnë nga veprimet ilegale dhe të papërgjegjshme të disa qytetarëve të pandërgjegjshëm, kjo paraqet edhe vepër penale të dënueshme. Në bazë të Ligjit të Furnizimit me Energji Elektrike, njehsorët janë pronë e KEDS-it dhe si të tillë, asnjë palë e jashtme nuk guxon të ketë qasje në ta apo të tentojnë të preken apo dhunohen në ndonjë formë.  Pos kësaj, secili njehsor ka edhe dy bllomba shtetërore, dhe hapja e tij apo prekja e tij paraqet dhunim të shtetit”, theksoi ai.

Edhe komuna e Podujevës ka konfirmuar problemin e shfaqur me kyçjen ilegale në rrjetin e KEDS-it. “Sipas informacioneve që ka komuna, defekti (djegia e njehsorëve) në rrjetin elektrik në fshatin Letanc ka ndodhur si pasojë e kyçjes ilegale të disa konsumatorëve, të cilët një ditë më pare ishin shkyçur nga rrjeti elektrik për shkak të borxheve ndaj KEDS-it”, thuhet në përgjigjen e Zyrës për Informim të Komunës së Podujevës.