Deputeti i Kuvendit të Kosovës nga radhët e Aleancës Kosova e Re (AKR) ka dalë me një kusht të ri për Qeverinë, pak javë pasi kushtëzoi mbështetjen ndaj ekzekutivit me emërimin e një ministri nga qyteti i tij i lindjes, Ferizaj.

Ai ka publikuar një deklaratë të xhiruar në llogarinë e vet në “Facebook” me të cilën i bën thirrje Qeverisë që në buxhetin për vitin 2019 ta përfshijë edhe ndërtimin e rrugës në fshatin Tërrn, nëse Qeveria dëshiron votën e tij për këtë buxhet.

Tahiri ka thënë se këtë premtim e kishte bërë së bashku me ministrin e Infrastrukturës, Pal Lekaj.

Publikimi i plotë i Tahirit pa ndërhyrje në drejtshkrim:

Mirëmëngjesi të dashur banorë dëgjojeni me vëmendje çështjen për rrugën e Terrenit dhe unë ju kam premtuar me Pal Lekajn, por si duket vazhdon humori me ne dhe tani unë ju përgjigjem kërkesës suaj që të dalim në rrugë sepse nuk po ka zgjidhje tjetër. Votën time si deputet, nuk do e jap për kalimin e buxhetit, due projekteve të Ferizajt, sepse këtu është ka prish punë dikush dhe mallku qofshin kushdo që është.

Kjo është mëkat cfarë keni bërë me ato fshatra. Këtë e bëj për shkak të banorëve.

Shperndajeni dhe ju bej thirrje i madh e i vogël të pëgatitemi për protesten e radhes dhe unë me nuk marrë pjesë në Seanca pa u kry kjo rrugë. Zoti ju bekoftë banorë se keni shumë të drejtë dhe shumë kanë lujt me ndjenjat e juaja.

Ma bani hallall nese nuk shtrohet, por një dite do të jap ndonjë pjesë të madhe për ato fshatra që të paktën me participua mbase kam premtua.

Me rrena nuk shkon jeta në Kosovë më.