Qazim Laçi ka qenë protagonisti i fitores së madhe 3-0 të Sparta Pragës ndaj Salzburgut në Ligën e Kampionëve. Goli i tretë i skuadrës çeke ishte pikërisht nga Laçi i cili me një lëvizje klasi shtriu mbrojtësit dhe portierin për të dërguar topin në rrjetën e boshatisur.

Goli i tij u shpërnda në rrjete sociale duke marrë vlerësime e komente të shumta, ndërsa vetë Laçi ishte në qiellin e shtatë pas përfundimit të takimit, duke folur për mediat çeke.

“Ndjesia është e mrekullueshme, fantastike. Luajta këtë kompeticion për herë të parë. Fituam dhe unë shënova gol. E gjithë skuadra luftoi, jam krenar për të gjithë. Ishte jashtëzakonisht entuziazmuese. Goli? Kryesisht duhet të falënderoj Viktor Olatunxhin për mënyrën se si më pasoi. Padyshim jam i lumtur që shënova gol, por në të vërtetë dua të uroj të gjithë skuadrën. Në këtë ndeshje e dinim që Salzburg do të mbante shumë topin, por ata ishin të brishtë në prapavijë. Ata u përmirësuan në pjesën e dytë, por ne e merituam këtë fitore”, ka thënë Laçi.