Emisari evropian për dialogun Kosovë-Serbi, Miroslav Lajçak, i ka bërë thirrje te Qeveria e Kosovës që “mos të frikësohet” nga drafti për Asociacionin, pasi sipas tij, i njëjti takon vlerat, standardet e praktikat evropiane.

Këtë deklaratë, ai e ka bërë në një intervistë dhënë së fundi, e të publikuar një ditë para takimit Kurti-Vuçiq në Bruksel.

Duke folur për “Sbunker”, Lajçaku ka përsëritur se për hartimin e draftit të përkrahur nga partnerët ndërkombëtarë, janë studiuar 16 modele ekzistuese.

“Ne kemi studiuar 16 modele ekzistuese të vetë qeverisjes dhe mbrojtjes së minoriteteve që ekzistojnë në zonën e Këshillit të Evropës, bazuar në modele të vërteta. Më në fund, prezantuam këtë dokument. Ua prezantova të dyja palëve më 21 tetor në Prishtinë e Beograd. Në këtë udhëtim, isha bashkë me këshilltarët nga Gjermania, Franca, Italia dhe përfaqësuesi special i ShBA-së. Me prezencën e tyre, ata treguan përkrahjen e plotë të shteteve të tyre prapa këtij dokumenti”, ka thënë ai.

Lajçaku ka treguar se reagimi i Qeverisë së Kosovës ishte konstruktiv dhe se kryeministri Albin Kurti kishte shprehur gatishmëri për ta nënshkruar.

“Ne kemi pasur një dokument për këtë, siç kam thënë më 26 tetor, ku kryeministri Albin Kurti na tha që është gati ta pranojë këtë dokument, po që se nënshkruhet nga Kosova dhe Serbia, bashkë me marrëveshjet nga Ohri. Që nga atëherë, fatkeqësisht, nuk ka pasur angazhim për këtë dokument nga ana e autoriteteve të Kosovës dhe nuk kemi pasur progres në implementimin e marrëveshjes”, ka thënë Lajçaku.

Më tutje, Lajçaku i ka bërë thirrje Qeverisë së Kosovës që ta dërgojë draftin në Kushtetuese, e mos të frikësohet.

Sipas tij, ai nuk ka propozuar diçka që “nuk do t’ia propozonte shtetit të tij”.

“Disa shtete të rëndësishme kanë kërkuar nga Kosova që ta dërgojë draftin për shqyrtim në Gjykatën Kushtetuese, që është mënyra më e mirë për të parë nëse dokumenti është në përputhje me kërkesat kushtetuese. Kështu që ky, do të thosha, është një propozim logjik për Qeverinë. Kështu, nuk ka arsye për t’u frikësuar nga ky dokument, sepse siç kam thënë, ne do të , dhe unë personalisht, nuk do të propozoja kurrë diçka që nuk do ta propozoja për shtetin tim, ose që do ta dija se nuk i takon standardet dhe vlerat evropiane, si dhe praktikat evropiane”, ka thënë Lajçaku.