Dhjetë persona kanë vdekur dhe dhjetëra të tjerë janë lënduar si pasojë e daljes nga rruga të një autobusi me targa të Kosovës në Sllavonski Brod në Kroaci, i cili po udhëtonte në linjën e rregullt Frankfurt-Prishtinë.

Autobusi është i kompanisë ‘Deva Tours’.

“Gjatë hetimit, policia ka konstatuar se bëhet fjalë për një autobus me tabela të Kosovës dhe sipas informacionit që kemi aktualisht, dhjetë persona kanë vdekur dhe dhjetëra të tjerë janë dërguar në spitalin në Sllavonski Brod për trajtim mjekësor”, ka thënë zëdhënësi i Policisë në Brod Posavina, Damir Breziq, për Radio-Televizionin Kroat (HRT).

Sipas tij, situata është shumë e vështirë dhe se shumë persona janë në rrezik për jetën.

Shefi i policisë së trafikut në Sllavonski Brod, Franjo Galiq, u ka thënë gazetarëve se policia ka marrë raportime më 25 korrik në orën 6:20, se një autobus ka dalë nga rruga.

“Pas mbërritjes në vendin e ngjarjes, është përcaktuar se ishte një autobus me targa të regjistrimit të Kosovës, i cili po udhëtonte në linjë të rregullt Frankfurt-Prishtinë. Hetimi është duke vazhduar, ne e dimë me siguri se disa njerëz kanë vdekur, më shumë se 30 persona janë transportuar në spital”, ka thënë Galiq.

Aksidenti ka ndodhur afër shtëpizës për pagesë të rrugës.

Presidentja e Kosovës, Vjosa Osmani, e ka quajtur tragjik, lajmin për aksident.

“Me zemër e me shpirt sot jemi me familjet që humbën më të dashurit në këtë tragjedi. Dhimbja është e papërshkrueshme e humbja shumë e madhe. Ngushëllime të sinqerta për të gjithë!

Shteti i Kosovës do të jetë në krah të familjeve të atyre që humbën jetën, sikurse edhe të të lënduarve, të cilëve ju dëshiroj shërim të shpejtë”, ka thënë Osmani.

Edhe kryetari i Kuvendit të Kosovës, Glauk Konjufca ka reaguar pas tragjedisë së sotme në Kroaci.

Konjfuca ka shprehur lutjet që të ketë sa më pak viktima.

“Në mëngjesin e sotëm ka ndodhur një aksident i rëndë në autostradën Slavonski Brod në Kroaci! Autobusi ishte i linjës Frankfurt-Prishtinë, i mbushur me bashkatdhetarë. Duke u lutur që të ketë sa më pak viktima, bashkëndjejmë të pikëlluar me familjarët e bashkatdhetarëve që u aksidentuan në këtë ngjarje të trishtë”, ka shkruar Konjufca në “Facebook”.

Kryeministri i Kosovës, Albin Kurti ka thënë se ende nuk ka konfirmime zyrtare për detajet e aksidentit.

“Me pikëllim të thellë e morëm lajmin për aksidentin tragjik në Kroaci, të një autobusi me targa të Kosovës. Ndonëse ende nuk kemi konfirmime zyrtare për detajet, lutemi të ketë sa më pak të vdekur e sa më shpejt të shërohen të lënduarit. Ministri ynë i Punëve të Brendshme po niset për Kroaci, ndërkaq drejt vendit të aksidentit te autostrada e Sllavonski Brodit tashmë është nisur ambasadori ynë në Zagreb”, ka thënë Kurti përmes një postimi në “Facebook”.

Presidenti kroat, Zoran Millanoviq, ka shprehur ngushëllime për familjet e pasagjerëve të vdekur, derisa ka thënë se është me autoritetet dhe popullin e Kosovës në këtë moment të vështirë për ta.

“U uroj shërim të shpejtë pasagjerëve të plagosur”, ka thënë ai përmes një postimi në “Facebook”.

Ndërkohë kryeministri i Krocisë, Andrej Plenkoviq, ka thënë në “Twitter” se me trishtim të madh e ka pranuar lajmin për incidentin me autobus, me targa të Kosovës.

“Bashkëndjejmë me familjet e viktimave, autoritetet dhe popullin e Kosovës, të cilëve u shprehim ngushëllime të thella. Shpresoj që pasagjerët e plagosur të shërohen”.

S velikom tugom primili smo vijest o slijetanju autobusa s ceste kod Slavonskog Broda u kojem je život izgubilo 10 ljudi. U mislima smo s obiteljima žrtava i 🇽🇰 vlastima i narodom, kojima izražavamo duboku sućut i suosjećanje. Nadamo se da će se ozlijeđeni putnici oporaviti.

— Andrej Plenković (@AndrejPlenkovic) July 25, 2021

Ndërkohë ministri i Jashtëm kroat, Gordan Gërliq Radman, ka thënë se ka biseduar me ministren për Punë të Jashtme dhe Diasporë në Qeverinë e Kosovës, Donika Gërvalla, për t’i shprehur ngushëllime popullit të Kosovës dhe familjeve të viktimave.

I spoke 📞 to 🇽🇰 Minister @gervallaschwarz and expressed my condolences to the people of 🇽🇰 and the families of the victims of the tragic bus accident that occurred this morning in #Croatia, as well as hope for a speedy recovery of the injured.

— Gordan Grlić Radman (@grlicradman) July 25, 2021