![](https://www.epokaere.com/wp-content/uploads/2022/02/AA49D3FF-42E4-4E6F-AAE6-756BA502FD9C.jpeg)
Latifi: Drama e veriut lidhet me planin franko-gjerman
Profesori universitar dhe njohësi i çështjeve politike, Blerim Latifi, ka thënë se situata e tensionuar në veri të Kosovës ndërlidhet me planin franko-gjerman.
Ai ka thënë se Kosova ka dhënë shenja të qarta se Kosova do të pajtohet me këtë plan, ndërsa Serbia sipas tij duket se e ka refuzuar dokumentin.
“E gjithë kjo dramë e veriut lidhet me planin franko-gjerman. Dje Borrelli tha se 27 vendet e BE-së janë pajtuar me planin. Kosova ka dhënë shenja të qarta se pajtohet me të. Serbia, ndërkaq, duket se e ka refuzu. Që të shmangë presionin ndërkombëtar për shkak të refuzimit, Vuçiqi ka nxitur rebelimin e serbëve në veri dhe ka nisur propagandën për rikthimin e ushtrisë serbe në Kosovë. Kjo është logjika e horrave në politikë: që të shmangin një problem, e krijojnë një tjetër; për t’i ikur një krize, e shpikin një krizë tjetër”, ka shkruar Latifi në “Facebook”.
Në këtë kontekst, ai ka thënë se Kosova thjesht është duke u përpjekur ta mbrojë atë që thuhet në ligjin e saj themelor, në Kushtetutën e Republikës.
“A ka bërë kryeministri Kurti gabime në këtë drejtim? Po, disa. Parasegjithash duke i shpërfillur këshillat amerikane, duke besuar se mund t’ia dalë i vetëm në vendosjen e rendit në veri dhe duke këmbëngulur në pikëpamjen e tij të vjetër se shkaku i problemit të veriut gjendet në Prishtinë. Shpresojmë të ketë marrë mësimet e duhura nga këto gabime. Ky është thelbi i krejt kësaj drame. Të tjerat janë kakofoni e transheve partiake dhe e platformave të mosdurimit personal”, ka shkruar Latifi.