Kandidati për deputet nga Partia Demokratike e Kosovës (PDK), Blerim Latifi, ka thënë se janë disa shkaktarë për listat e fryra të veteranëve të luftës.

Latifi në “Debat Plus” në “RTV Dukagjini” ku po diskutohet tema për veteranët, ka thënë se Komisioni për verifikimin e veteranëve nuk e ka pasur përvojën në këtë temë, ndërsa ai ua lë fajin edhe disa nga komandantët që kanë nënshkruar listat me veteranë të rrejshëm për interesa të ndryshme.

“Madje disa nga komandantët mohojnë se ka lista të fryra. Konkretisht nga AAK e thonë këtë”, ka thënë Latifi.

Sipas tij nga listat që kanë dalë 17 mijë veteranë janë nga Zona e Dukagjinit dhe kjo nuk është e vërtetë.

“UÇK-ja i ka pasur jo më shumë se 15 makë ushtarë”, ka thënë  Latifi.

Përfaqësuesi i PDK-së tha se listat e fryra i japin shije të keqe dhe e dëmtojnë reputacionin e UÇK-së.

Latifi ka thënë se ky fenomen i shëmtuar po e dëmton edhe buxhetin e Kosovës dhe sipas tij ky është krim dhe duhet të ndalohet.

“Ky krim duhet të ndalohet dhe do të ndalet kur të vjen në pushtet PDK me kryeministër Kadri Veselin”, ka thënë Latifi.

Sipas tij PDK-ja është e para që ka reaguar ndaj kësaj dukurie duke shtuar se ky fenomen ka shpërthyer në kohën sa kryeministër ishte Isa Mustafa dhe LDK e kishte Ministrinë e Financave.