Ministri i Jashtëm rus, Sergej Lavrov, ka thënë se mbështetja e dhënë nga ShBA-ja, Britania dhe Franca për Ukrainën ushqen rreziqe serioze strategjike, të cilat rrisin mundësinë e një konfrontimi të drejtpërdrejtë midis fuqive më të mëdha bërthamore në botë.

Lavrovi ka vlerësuar se ShBA-ja dhe NATO-ja janë të fiksuara me idenë e arritjes së një “disfate strategjike” në Rusi, duke shtuar se ekziston rreziku që ky konfrontim të çojë në një nivel të shtuar të rrezikut bërthamor.

“Perëndimi po shkon në mënyrë të rrezikshme në prag të një konflikti të drejtpërdrejtë ushtarak midis fuqive bërthamore, i cili do të ketë pasoja shkatërruese. Shqetësues i veçantë është fakti se vendet bërthamore perëndimore janë ndër financuesit kryesorë të regjimit kriminal në Kiev, nxitësit kryesorë të hapave të ndryshëm provokues. Ne shohim rreziqe strategjike në këtë, duke çuar në një rritje të nivelit të rrezikut bërthamor”,  ka thënë Lavrovi.

Tre vendet perëndimore që kanë armë bërthamore janë ShBA-ja, Britania dhe Franca.