Lekaj: Me ardhjen e LV-së në pushtet është bërë më se normale t’i fyesh vlerat e luftës
Deputeti i AAK-së, Pal Lekaj, ka reaguar pas postimit të zyrtarit të Vetëvendosjes Hysamendin Ferajt, i cili ka shkruar se “Ramushi nuk dha përgjigje pse nuk është vrarë në luftë por janë vrarë vëllezërit e tij”.
Lekaj ka shkruar në “Facebook” se deklaratat e gojëprishurit dhe mbeturinës së fundit të komunizmit shqiptar janë po aq skandaloze sa heshtja e kryeministrit Albin Kurti.
“Është me të vërtetë e shëmtuar kur bënë këto pyetje një shqiptar, më keq akoma kur ai është pjesë e një partie politike që udhëheq qeverinë e Kosovës, në formatin më të lehtë është dashur të largohej prej partisë dhe të shpallej person non-grata”.
“Thënë shkurt, me ardhjen e LV-së në pushtet, është bërë mëse normale t’i fyesh vlerat e luftës çlirimtare”, ka shkruar Lekaj.
