Ministri i Infrastrukturës, njëherësh nënkryetar i AAK-së, Pal Lekaj, ka thënë se kërkesa e komanisë “Bechtel&Enka”, ka qenë që Kosova për autostradën“Arbën Xhaferi” të paguajë 717 milionë euro.

Lekaj, në “Debat Plus” të  “RTV Dukagjini”,  ka thënë se pavarësisht se autostrata është shtyrë, projekti është një kryevepër që do të mbetet jetë e mot.

“Për të gjithë të interesuarit mund të tregoj se kontrata fikse e autostradës ‘Arbën Xhaferi’ është 706 milionë euro. Kërkesa e tyre ka qenë për 717 milionë euro, por pas barazimit të faturave unë ua kam ndalur 9 milion e 500 mijë euro”, ka thënë Lekaj.

Ai ka thënë se shifrat totale që ai u ka ndalur edhe për shkak të vonesave shkon në 11 milionë e 700 mijë euro.

Lekaj ka shtuar së në këtë pagesë është përfshirë edhe dëmshpërblimi prej 53 milionë eurove, që Kosova ka pasur detyrim ndaj “Bechtel&Enka”.

“Sado që është përfolur ky projekt, nëse krahasohet me rajonin, po e marr Kroacinë. Asaj i ka kushtuar kilometri 16-17 milionë euro në autostradën Rijeka – Pazin. Vetë unë kam qenë për vizitë atje”, ka thënë ai.

Më tutje, Lekaj ka thënë se Qeveria ka përballuar shumë sfida e sharje, por projekti ka përfunduar me sukses dhe ia ka vlejtur.

“Sot ndoshta do të kishim folur sa do të kushtojë arbitrazhi që përafërsisht do të shkonte 200 milionë euro”, ka thënë Lekaj.