Bayern Munchen merr të tjera lajme të këqija nga infermieria. Klubi “bavarez” nuk do të ketë për disa kohë shërbimet e Kingsley Coman për shkak të lëndimit që futbollisti francez pësoi në ndeshjen e së shtunës, në Augsburg.

Raporti mjekësor i publikuar nga Bayerni në kanalin zyrtar tregon për një dëmtim të ligamentit kolateral medial të gjurit të majtë.

“Është pa dyshim një goditje e madhe. Por duke e njohur Kingsley-n, ai do të kthehet edhe më i fortë. I urojmë shërim të shpejtë”, tha drejtori sportiv, Christoph Freund.

Sipas “Sky Sport Germany”, klubi bavarez po mendonte të afronte që në janar Bryan Zaragozas, sulmuesi spanjoll i Granadas, të cilin Bayern e ka blerë për sezonin e ardhshëm. Drejtuesit e klubit gjerman kontaktuan me drejtuesit e Granadës, por përgjigja ishte negative.