Gazetarët, publicistët, historianët dhe ekspertët tjerë shkencorë, kanë obligim dhe përgjegjësi, që gjeneratave të reja t’ua lënë faktografinë lidhur me sakrificën e madhe të popullit shqiptar gjatë periudhës së kaluar nën sundimin serbo-jugosllav për ta pasqyruar historinë më të re kombëtare. Mirëpo, veprat e tilla, duhet të përkthehen dhe botohen edhe në gjuhë të huaja, që për historinë më të re kombëtare të informohen edhe miqtë tanë në mbarë botën, sepse propaganda serbe dhe ruse kundër Kosovës dhe shqiptarëve, e veçmas luftës së lavdishme të Ushtrisë Çlirimtare të Kosovës është e tmerrshme.

Ky ishte mesazhi i pjesëmarrësve të promovimit të “Librit të luftës” të autorit, gazetarit dhe publicistit të njohur Nuhi Bytyçi të premten mbrëma në ambientet e Ambasadës së Republikës së Kosovës në Vjenë. Organizatori i këtij promovimi, Konsulli i Republikës së Kosovës në Vjenë, z.Isa Kosumi dhe po thuaj të gjithë pjesëmarrësit e këtij evenimenti, shprehën domosdonë që institucionet kompetente të shtetit të Kosovës të mbështesin përkthimin e “Librit të luftës” dhe të veprave të ngjashme edhe në gjuhën angleze, gjermane, franceze dhe në gjuhë të tjera. Bashkëkombasit tanë nga të gjitha trojet etnike shqiptare të organizuar në shoqata të ndryshme në Austri dhe Konsulli Isa Kosumi, në emër të Ambasadës së Republikës së Kosovës në Vjenë, shprehën gatishmërinë që të mbështesin përkthimin profesional të “Librit të luftës të Nuhi Bytyçit në gjuhën angleze dhe gjermane.

Duke e hapur promovimin e “Librit të luftës”, konsulli i Kosovës në Austri, Isa Kosumi, rikujtoi se “kjo vepër jetësore e gazetarit Nuhi Bytyçi, është thesar i çmueshëm për bibliotekat tona, nga se ai tash e 4 dekada me raportimet e tij profesionale nga ngjarjet më të rëndësishme historike të popullit shqiptar në Kosovë dhe viset e tjera etnike shqiptare, ka qenë i pranishëm përherë dhe ka mbajtur gjallë ndjenjën e atdhedashurisë dhe të përkushtimit për shqiptarinë.” Kosumi vlerësoi lart, sidomos punën profesionale të Nuhi Bytyçit gjatë periudhës së luftës së Ushtrisë Çlirimtare të Kosovës për liri e pavarësi, por edhe atë të UÇPMB-së dhe të Ushtrisë Çlirimtare Kombëtare për të drejta të plota kombëtare të shqiptarëve në trojet e lashta etnike.

Duke e paraqitur një analizë të hollësishme lidhur me “Librin e luftës”, gazetari Mentor Gashi, pos tjerash u ndal në kontributin e gazetarit e publicistit Nuhi Bytyçi, por edh të kolegëve të tij në TV e Prishtinës në rrethana të kontrollimit komunist të TVP-së për informimin objektiv të opinionit, për thyerjen e censurës në këtë medium, pastaj për angazhimin e Bytyçit pas mbylljes së TVP-së dhe të mediave tjera shqiptare, sidomos punën e tij në Televizionin Shqiptar në Tiranë për ti ofruar opinionit shqiptar dhe atij ndërkombëtar të gjitha imazhet nga zonat e luftës në Kosovë, dokumentarët për dëshmorët dhe heronjtë tanë që u sakrifikuan për lirinë e popullit shqiptar, raportimin nga shpallja e pavarësisë së Kosovës më 17 shkurt 2008 dhe nga ngjarjet e tjera të rëndësishme.

Luftëtari i UÇK-së, Rexhep Sahiti, përkujtoi rolin e jashtëzakonshëm të gazetarit Nuhi Bytyçi, duke raportuar nga të gjitha zonat e luftës në Kosovë dhe e quajti atë “ hero të gjallë”. Sahiti e vlerësoi “Librin e luftës” të Bytyçit një vepër me vlera të posaçme historike, duke e konsideruar edhe “bombë atonike kundër propagandës së Serbisë ndaj Kosovës dhe UÇK-së”.

Veprimtari i shquar i Republikës së Shtajmarkut, arkitekti Fatmir Osmani, në emër të bashkëveprimtarëve të tij nga kjo republikë shprehu bindjen se “ky libër ka vlera të veçanta historike, nga se Bytyçi sjell dëshmitë e tij autentike nga ngjarjet nëpër të cilat ka kaluar populli shqiptar dhe më së paku flet për veten, por në plan të parë në mënyrë të argumentuar dhe me fotografi flet për të tjerët, sidomos për heronjtë e lirisë dhe të pavarësisë sonë”.

Edhe Osmani, shprehu gatishmërinë që shoqatat shqiptare në Austri të organizohen për angazhimin e përkthyesve me përvojë në anglisht e gjermanisht, në mënyrë që ta përkthejnë këtë vepër, e cila meriton të jetë në bibliotekat e institucioneve të ndryshme ndërkombëtare. I këtij mendimi ishte edhe Anton Marku, kryetar i Shoqatës së shkrimtarëve shqiptarë në Austri, i cili pohoi se “Nuhi Bytyçi është kontributdhënës aktiv dhe i rëndësishëm në ndriçimin e shumë ngjarjeve historike dhe vepra e tij meriton mbështetje institucioneve të Republikës së Kosovës.

Edhe veteranët e arsimit Hazir Mehmeti e Osman Ademi, Agron Çika nga Shoqata “Arbëria”, Vlora Jonuzi, Violeta Allmuça e të tjerë, shprehën vlerësimet e tyre pozitive për punën e Nuhi Bytyçit në informimin e opinionit dhe e falënderuan për gatishmërinë e tij për të komunikuar drejtpërdrejtë me lexuesit.

Duke falënderuar Ambasadën e Republikës së Kosovës në Vjenë, e sidomos Konsullin Isa Kosumi për organizimin e promovimit të librit të tij edhe në Vjenë, Nuhi Bytyçi përkujtoi se “në librin tim, një pjesë e konsiderueshme i është kushtuar edhe kontributit tuaj të jashtëzakonshëm të bashkadhetarëve tanë në vendet evro-perëndimore gjatë viteve të tetëdhjeta e nëntëdhjeta, kur Kosova dhe viset e tjera shqiptare ishin nën okupimin serbo-sllav në mbajtjen gjallë të atdhedashurisë, të forcimit të rezistencës gjithë popullore kundër Serbisë, financimin e arsimit, informimit, shëndetësisë, kulturës dhe institucioneve tjera paralele në Kosovë, e veçmas financimin e luftës së Ushtrisë Çlirimtare të Kosovës për liri e pavarësi, pastaj luftës së UÇPMB-së në Kosovën lindore dhe të Ushtrisë Çlirimtare Kombëtare në Maqedoni për të drejta të plota kombëtare.”

Bytyçi dëshmoi se shumë nga mërgimtarët që kanë punuar në vendet evroperëndimore i kanë dalë zot atdheut në momentet më vendimtare dhe shumë prej tyre i kam takuar gjatë luftës në mesin e luftëtarëve të lirisë në të gjitha zonat e luftës në Kosovë, Kosovën lindore dhe në Maqedoni.

Autori Bytyçi rikonfirmoi se “pa kontributin financiar dhe pa pjesëmarrjen aktive të mërgimtarëve tanë dhe pa mbështetjen e gjithanshme të shtetit amë – Shqipërisë, lufta për liri e pavarësi të Kosovës dhe të viseve tjera shqiptare nuk do të bëhej. Kështu, sot falë sakrificës së popullit tonë, luftës së UÇK-së dhe ndihmës së botës demokratike dhe NATO-s, Kosova është e lirë, shtet sovran dhe i pavarur.”

Nuhi Bytyçi duke iu përgjigjur shumë pyetjeve të pjesëmarrësve të promovimit, konfirmoi se “puna e gazetarit nuk është aspak e lehtë. Gazetari gjithmonë është në luftë, në luftë për të vërtetën, në shërbim të së mirës së atdheut të tij dhe të njerëzimit, në shërbim të publikut. Unë kështu e kam kuptuar gjithmonë gazetarinë dhe në këtë frymë jam angazhuar me tërë përkushtimin tim në të gjitha kohërat. Falë mbështetjes së ish-udhëheqjes ushtarake dhe politike të UÇK-së dhe të popullit, unë bashkë me kameramanin Abaz Zeka dhe kolegët e tjerë kemi arritur që me sukses ta kryejmë misionin tonë profesional dhe atdhetar ”, theksoi Bytyçi.

“Librit të luftës” dhe autori i tij Nuhi Bytyçi do të paraqitet edhe para bashkëkombëseve tanë që jetojnë e punojnë në Slloveni. Në organizim të Ambasadës së Republikës së Kosovës në këtë shtet mik dhe të Shoqatës kulturore shqiptare “Iliria”, promovimi i këtij libri do të bëhet të dielën më 5 maj në orën 15:00 në Kopër.