Ministri i Mjedisit, Planifikimit Hapësinor dhe Infrastrukturës, Liburn Aliu ka reaguar pas lajmit se është i akuzuar, ku ka thënë se asnjëherë nuk ka qenë i njoftuar e as i kontaktuar nga Prokuroria ose Gjykata për këtë aktakuzë.

Aliu përmes një postimi në “Facebook”, ka theksuar se ka marrë hapat për të konfirmuar këtë çështje, ndërsa ka thënë se ngritja e aktakuzës pa njoftimin e tij si palë është shkelje procedure për çka tha se do të kërkojë përgjegjësi.

“Pas lajmit që pashë sot në disa media në lidhje me gjoja akuzimin tim për keqpërdorim të detyrës zyrtare, gjatë kohës sa kam qenë Drejtor i Urbanizmit në Komunën e Prishtinës, ndjehem i obliguar të ndaj këtë reagim”.

“Unë për këtë rast kam dëgjuar për herë të parë nga mediat sot. Marrë parasysh këtë, e kam të pamundur të komentoj mbi substancën e rastit, por mund të them disa fjalë mbi procesin e munguar”, ka shkruar Aliu.

Ai ka treguar se me të lexuar lajmin, kam ndërmarrë hapat e duhur për të konfirmuar këtë çështje.

“Unë nuk kam qenë dhe akoma zyrtarisht nuk jam në dijeni për asnjë aktakuzë që ekziston ndaj meje. Asnjëherë nuk jam kontaktuar as nga Prokuroria, as nga Gjykata për t’u informuar në mënyrë zyrtare se ekziston ndonjë aktakuzë e ngritur kundër meje. Ngritja e aktakuzës (nëse diçka e tillë është e vërtetë) pa njoftimin tim si palë, është shkelje e procedurës. Dhe për këtë unë do të kërkoj përgjegjësi”, ka shkruar ai.