Drejtori ekzekutiv i “Sigma Vienna Insurance Gruoup” në Kosovë, Genond Mesareja, ka thënë se Sigma ka mbështetur zhvillimin ekonomik të Kosovës duke gërshetuar rrezikun e madh me një gamë të gjerë të produkteve të sigurimit.

Sipas tij, kjo ka qenë vendimtare për investime të rëndësishme publike dhe private të bëra nga kompanitë vendore dhe ndërkombëtare.

Mesareja ka theksuar se industria e sigurimeve po bëhet shumë e rëndësishme në Kosovë, derisa pohoi se vitin e kaluar Sigma në Kosovë mbuloi rrezikun agregat maksimal në vlerë 68 miliardë euro ose shtatë herë më shumë se bruto prodhimi vendor real i Kosovës.

“Gjatë vitit ‘Sigma Vienna Insurance Group’ ka mbështetur zhvillimin ekonomik të Kosovës duke gërshetuar rrezikun e madh me një gamë të gjerë të produkteve të sigurimit. Kjo ka qenë vendimtare për investime të rëndësishme publike dhe private të bëra nga kompanitë vendore dhe grupet shumëkombëshe si Aeroporti koncesionar dhe Kompania e Energjisë Elektrike në Kosovë. Edhe pse Kosova është një vend në zhvillim, industria e sigurimeve po bëhet gjithnjë e më e rëndësishme. Mund të vërtetohet lehtësisht me numra. Vitin e kaluar Sigma VIG (Vienna Insurance Group), mbuloi rrezikun agregat maksimal në Kosovë prej 68 miliardë eurove, që do të thotë sa shtatë herë GDP-ja reale e Kosovës”, ka thënë ai, duke shtuar se Sigma në Kosovë është lider madhor.

“Ne jemi adresë e njohur referente për organizatat ndërkombëtare, ambasadat, bizneset vendore dhe individët në Kosovë. Nëpërmjet politikave strikte dhe marrëveshjeve të ri-sigurimit me një kompani sigurimesh të klasifikuar A-plus, si dhe anëtarë të tjerë ne kemi rritur kapacitetet tona mbuluese dhe kemi mbuluar me sukses rrezikun e madh në Kosovë. Çelësi për ndërtimin dhe mbajtjen e një biznesi të qëndrueshëm në Kosovë nuk është vetëm respektimi i legjislacionit, por edhe zbatimi me sukses i standardeve të larta të Vienna Insurance Group në vend. Kujdesi profesional, standardet e larta të nënshkrimit, pretendimet strikte kanë qenë politikat dhe rezervimi adekuat financiar për këto gjëra janë garancia më e mirë për të minimizuar rreziqet e kompanisë dhe për të respektuar plotësisht detyrimin tonë kontraktual ndaj klientëve tanë”, është shprehur ai.

Drejtori ekzekutiv i Sigma-s ka pohuar se do të vazhdojnë në rrugën e rritjes së qëndrueshme në Kosovë, me parimin ESG dhe do të mbetet pikë referimi për shërbimet cilësore të sigurimit në Kosovë.

Në anën tjetër, drejtori i Bordit Mbikëqyrës të “Sigma Vienna Insurance Gruoup”, Peter Hofinger, ka shprehur admirimin e tij për punën e Sigma-s në Kosovë.
Ai ka thënë se Sigma është një kompani e sigurimeve e themeluar 200 vjet më parë dhe se me idetë dhe synimet për të vazhduar edhe 200 vjetët e ardhshme.

“Më duhet të them konkretisht për Kosovën se ka një admirim të plotë për punonjësit tanë, menaxhmentin tonë, duke pasur parasysh 20 vjetët e fundit në Kosovë që e pasojnë 12 vjetët e fundit më afër me gjithë këto luhatje, pasiguri, paparashikueshmëri të zhvillimit të caktuar, ne kemi një kompani fantastike këtu, po fokusohemi te klientët, jemi në një biznes besimi, po japim një premtim, një premtim të cilin thjesht e keni në letër. Njerëzit duhet të besojnë se ne do ta përmbushim detyrimin tonë dhe modeli i biznesit të sigurimeve në fund të fundit është punë e njerëzve dhe njerëzit janë të suksesshëm në biznesin tonë. Prandaj, një falënderim shumë i madh për punonjësit tanë, falënderim shumë i madh për menaxhmentin tonë këtu, i cili është në gjendje në një mjedis jo gjithmonë të lehtë për ta çuar kompaninë tonë drejt suksesit”, ka deklaruar Hofinger, duke shtuar se klientët janë të kënaqur me punën e tyre.

Gjatë gjithë periudhës se operimit në tregun e Kosovës, “Sigma Vienna Insurance Group” – Dega Kosovë ka pasur rezultate evidente pozitive sidomos në aspektin e situatës se qëndrueshme financiare, plotësimit të nevojave të klientëve për produktet e sigurimit, rritjes së garancive dhe të besueshmërisë me mbështetjen e një rrjeti efikas ri-sigurimi, bashkëpunimit të suksesshëm dhe korrekt me partnerët lokalë dhe ndërkombëtarë.