Udhëheqësi i opozitës në Izrael, Yair Lapid, e ka quajtur sulmin e Hamasit një “dështim të pafalshëm” nga qeveria Netanyahu, duke shtuar se ai nuk do t’i bashkohet kabinetit të luftës emergjente.

Benjamin Netanyahu dhe politikani i opozitës Benny Gantz ranë dakord të linin mënjanë një rivalitet të ashpër politik dhe formuan një qeveri emergjente të mërkurën.

Lapid është themeluesi i partisë centriste Yesh Atid dhe aktualisht është lider i opozitës zyrtare në Knesset.

Krahas Netanyahut dhe Gantz, kabineti i ri i përkohshëm përfshin ministrin e Mbrojtjes, Yoav Gallant.

Netanyahu dhe Gantz thanë në një deklaratë të përbashkët se një vend do t’i rezervohej Lapidit në kabinetin e qeverisë.

Megjithatë, duke folur të enjten, Lapid tha se Netanyahu dhe Ben Gvir “nuk ishin njerëzit që do të rivendosnin besimin e shkatërruar të popullit izraelit në qeverinë e tyre”.

Lapid shtoi se partia e tij nuk do ta kundërshtojë qeverinë dhe do ta mbështesë atë gjatë krizës së sigurisë, shkruan BBC.