Partia Demokratike e Kosovës (PDK) e ka cilësuar si shumë të mirë lajmin se Gjykata Kushtetuese e ka shpallur anti-kushtetues Ligjin për Komisionin e Pavarur të Medieve (KPM).

PDK-ja në reagim ka thënë se Kushtetuesja ka vërtetuar edhe një herë se pushtetit në ikje e ka shkelur Kushtetutën.

“Vendimi për ta shpallur Ligjin nr. 08/L-289 për Komisionin e Pavarur të Mediave si anti-kushtetues është dëshmi e qartë se qeverisja e kaluar e ka përdorur shumicën parlamentare për të kapur institucionet e pavarura, në kundërshtim me parimet kushtetuese dhe demokratike”.

“Ky nuk është rasti i parë që Gjykata Kushtetuese e rrëzon një ligj të këtij pushteti në ikje. Me këtë qasje anti-kushtetuese kanë qeverisur – dhe me të edhe po ikin”,  është thënë në reagim e PDK-së.

Më tutje, PDK-ja ka thënë se e mirëpret këtë vendim dhe riafirmon zotimin e tyre për të garantuar liri të medieve, pavarësi institucionale dhe sundim të ligjit.

“Koha e kapjes së shtetit po mbaron. Kosova mundet ma mirë”, është thënë në këtë reagim e PDK-së.