Senati amerikan po kërkon rrugëzgjidhje për t’i dhënë fund mbylljes së Qeverisë, e cila ka hyrë në ditën e 35-të, duke kërcënuar ekonominë si dhe dukë lënë qindra mijëra punëtorë federal pa pagesë.

Senati ka refuzuar dy ligje që do të mundësonin hapjen e qeverisë, njëri i mbështetur nga presidenti amerikan, Donald Trump dhe tjetri nga ligjvënësit demokratë.

Tani një grup i ligjvënësve demokratë dhe republikanë thanë se do t’i propozojnë Senatit një amandament i cili do të mundësonte hapjen e përkohshme të qeverisë, raporton “Reuters”.

Kjo është mbyllja me e gjatë e qeverisë në historinë e ShBA-së.

Presidenti i Shteteve të Bashkuara, Donald Trump, ka thënë të enjten se nëse udhëheqësi i shumicës republikane në Senat, Mitch McConnell dhe udhëheqësi i demokratëve, Chuck Schumer arrijnë marrëveshje për hapjen e qeverisë, ai do ta përkrahë atë.

Presidenti amerikan, Donald Trump është duke kërkuar 5.7 miliardë dollarë për ndërtimin e murit në kufirin me Meksikën mirëpo kjo po kundërshtohet nga demokratët që përbëjnë shumicën në Dhomën e Përfaqësuesve.