Zëvendëskryeministri i Kosovës, Fatmir Limaj, ka thënë se situata aktuale politike në vend po sillet rreth dy temave të mëdha për vendin, siç është taksa dhe është çështja e dialogut me Serbinë.

Limaj ka thënë se në dialogun me Serbinë vetëm të bashkuar si spektër politik mund t’ia dalin me sukses.

Kryetari i Nismës në një mbledhje të Këshillit Drejtues të Degës së Nismës në Prizren, ka thënë se hyrja në dialog pa një orientim të qartë, pa një platformë dhe pa asnjë kushtëzim siç ka filluar në vitin 2011, i ka bërë dëm vendit.

Sipas tij, pasojat e marrëveshjeve të vitit 2013 e 2015 po i vuajmë sot.

“Në procesin dialogues me Serbinë shqiptarët duhet bëhen bashkë. Ka qenë shumë i nevojshëm Delegacioni Shtetëror për Bisedime dhe miratimi i platformës për dialog. Sot si asnjëherë me parë procesi i dialogut ka përgjegjësi. Ne kemi ngritur çështjen e të zhdukurve, krimet e luftës, dhunimet seksuale të gjitha ato janë të listuara dhe të cilat duhet adresohen në marrëveshjen përfundimtare”, ka thënë Limaj.

Ai ka thënë se në Kosovë nuk do të lejojnë asnjëherë një republikë ‘Srpska’ dhe as  themelim të Asociacionit me kompetenca ekzekutive.

Sa i përket taksës, ai ka thënë se ka ardhur si rezultat i sjelljes së Serbisë, por ka shtuar se vendimet shtetërore nuk janë individuale, por janë të përbashkëta.

Limaj i ka siguruar që asnjëherë nuk do të vendoste nënshkrim ku do të dëmtohet vendi.

Sa i përket partisë të cilën ai e drejton, Limaj ka thënë se koha ka dëshmuar sa ka qenë i nevojshëm themelimi i Nismës.

“Po ju ftoj ta zhvillojmë këtë frymë politike në fshatra dhe lagje të Prizrenit. Alternativa e Nismës në Prizren po fuqizohet çdo ditë e më shumë. Sot në mesin tonë, kemi shumë bashkëluftëtare dhe njerëz të dëshmuar. Ju falënderoj për krejt punën sepse të arriturat janë të përbashkëta”, ka thënë Limaj të premten në Prizren.

Kryetari i Degës së Nismës në Prizren, Zafir Berisha, tha se Nisma ka pasur aktivitete të shumta në Prizren. 

Ai tha se fryma e Nismës po përhapet në çdo cep të Prizrenit. 

Deputeti Berisha ka thënë se besimi në Nismën po rritet çdo ditë e më shumë nga qytetarët e Prizrenit.