Zëvendëskryeministri i Kosovës, Fatmir Limaj, njëheresh bashkëdrejtues i delegacionit shtetëror për bisedime me Serbinë, ka thënë se Qeveria e Kosovës ka bërë përpjekje serioze që për herë të parë faktori politik të bashkohet dhe të ndërtohet një konsensus sa më i gjerë në dialog.

Përpjekja e kësaj qeverie, ka thënë Limaj se nga fillimi ka qenë më i dhanë mundësi konsensusit.

Limaj ka thënë se ideja dhe detyra e të gjithëve është të kthehet në binarë ky proces. Ai ka thënë se Kosova nuk është në presion të kohës, por është në presion të arritjes së një marrëveshje të mirë.

“Kjo marrëveshje që siguron paqe dhe siguri. Paqja në regjion është në përgjegjësi të gjithëve. Nga eksperienca jonë politikë çdo dialog ka tituj. Konferenca e Rambujesë ka pas titull. Brukseli ka pas titull dialog për normalizim të marrëdhënieve. Tash titulli duhet të jetë dialogu për njohje të Kosovës. Ne shkojmë për njohje asgjë tjetër”, ka thënë Limaj në një konferencë të organizuar nga Instituti Kërkimor për Çështje Evropiane dhe të Zhvillimit me titull: “Zëri i Popullit rreth ‘Finales së Madhe’ ndërmjet Kosovës dhe Serbisë”.

Më tutje, Limaj ka thënë se nëse Serbia nuk është e gatshme të futet në dialog për njohje, atëherë Kosova mund të pres.

Limaj ka deklaruar se nuk mund të ketë normalizim të raporteve mes dy vendeve për sa kohë që nuk ka njohje reciproke.

“Forcat politike në Kosovë duhet t’i lënë mënjanë interesat partiake, por të bëhen bashkë. Si Delegacion Shtetëror e kemi bërë një dokument i cili ka marrë mbështetje nga krerët e institucioneve. Kuvendi tash e ka në dorë dhe të vendos në mënyre që të kemi një zë. Ne jemi të gatshëm për dialog. Ajo që humbë Kosova është me ikë nga tavolina”, ka shtuar Limaj.

Limaj ka thënë se njohja nga ana e Serbisë, lehtëson dhe mundëson në realizimin e të gjitha marrëveshjeve që janë në interes të dy vendeve.

“Kosova nuk ka me pranu me asnjë çmim me rrënu dhe me negociuar sovranitetin e vendit. Kushdo që pret një gjë të tillë pret gabim”, ka përfunduar Limaj.

/Epoka e re/