Kryetari i Nismës Socialdemokrate, Fatmir Limaj, ka thënë se as qeveria e ardhshme nuk duhet ta largojë taksen për sa kohë që nuk pushojnë arsyet.

Madje, Limaj ka thënë se Nisma nëse është pjesë e qeverisë së ardhshme do të insistojë që të përdoret masa e reciprocitetit me vendet fqinje.

“Unë e di që pozicioni i Kosovës nuk do të ishte ky që është, sepse është instrument legjitim. Ne do të kërkojmë reciprocitet me fqinjët tanë”, ka shtuar Limaj në “Debat Plus” me Ermal Pandurin në RTV Dukagjini.

Ai ka shtuar se ky vend duhet të ketë një lloj të reciprocitetit të ndërsjellët.

Duke folur për objektivat e Nismës në zgjedhjet e parakohshme, Limaj ka thënë se synojnë mbi 10 deputetë dhe këto objektiva, thotë ai se nuk janë arrogante, por janë objektiva reale.

Më tutje, ai ka thënë se nuk do të pranonte të bënte koalicion me PDK-në edhe nëse atij ia ofrojnë postin e kryeministrit.

“Nëse me do populli për kryeministër, ata e dinë partinë tem, por nuk bëhem kryeministër me kombinacione”, ka shtuar ai.