Sadio Mane është emri kryesor në listën prej shtatë personash që do të lënë Bayern Munchen këtë verë, sipas raportimeve të medieve gjermane.

Thomas Tuchel i cili udhëhoqi Bayernin drejt titullit të 11 radhazi, të siguruar në javën e fundit të kampionatit, kërkon të rindërtojë skuadrën në “Allianz Arena” pas një sezoni plot oscilacione për gjigantët gjermanë.

Anësorët e Bayernit janë të parët në listën e merkatos, me Mane, Leroy Sane dhe Serge Gnabry që raportohet se ju është treguar dera e largimit sipas “Bild”.

Mbrojtësi i djathtë Bouna Sarr, portieri Alexander Nubel dhe mesfushori Marcel Sabitzer huazimi i të cilit te Manchester United përfundon me mbylljen e sezonit, gjithashtu janë të lirë të largohen.

Ndërkohë lista prej shtatë emrash kompletohet me Benjamin Pavard, i cili ka zgjedhur të mos zgjasë kontratën e tij me “bavarezët”. Futbollisti francez që ka zgjuar interesimin e Barcelonës dhe Liverpool mund të largohet menjëherë nëse një klub i ofron Bayernit 30 milionë euro.

Pavarësisht se firmosën me Mane vetëm verën e kaluar, gjigantët e Bundesligës janë gati të dëgjojnë ofertat për sulmuesin 31-vjeçar.

Mane ka shënuar vetëm 7 gola në 25 paraqitje në kampionat këtë sezon, dhe goditi me grusht në fytyrë Sane pas eliminimit në Ligën e Kampionëve nga Manchester City në prill. Ndërkohë Manchester United po monitoron situatën e Leon Goretzka, me futbollistin gjerman që pritet të largohet nëse nuk i garantohet një vend në skuadrën e parë nga Tuchel.