Serbia ka pak shanse që deri në fund të vitit 2018, në negociatat për anëtarësim në Bashkimin Evropian të hapë kapitullin 31, për politikë të jashtme, të sigurisë dhe mbrojtjes.

Gazeta serbe “Veçernje Novosti” ka raportuar se Lituania kundërshton hapjen e këtij kapitulli për shkak të raporteve në mes të Serbisë dhe Rusisë.

Ministrja e Integrimit Evropian të Serbisë, Jadranka Joksimoviq, ka thënë për këtë të përditshme serbe se procedura e negociatave është e tillë në qoftë se një raport për kapitull nuk është miratuar deri në mes të vitit, atëherë ky kapitull vështirë se do të hapet deri në fund të vitit.

“Kapitulli i 31-të nuk ishte shumë i kërkuar, por pasi marrëdhëniet ndërkombëtare janë komplikuar dhe vetë vendet e BE-vetë duhet të pajtohen në mënyrë që të arrijnë konsensus për disa çështje”, ka thënë ajo.

E pyetur nëse dikush tjetër përveç Lituanisë është duke e bllokuar këtë kapitull, Joksimoviq ka thënë se raporti i shqyrtimit për kapitullin 31 është rast i mbyllur për diskutim ndërmjet anëtarëve të BE-së.