Komuna e Drenasit, respektivisht kryetari Ramiz Lladrovci gjatë ditëve të fundit ka pranuar ankesa të ndryshme për vonesat që po bëhen në ofrimin e shërbimeve pranë Qendrës për Pajisje me Dokumente në Drenas. Qytetarët e Drenasit i kanë adresuar shqetësimet dhe pakënaqësitë e tyre në drejtim të komunës duke menduar që kjo qendër është në menaxhim të komunës së Drenasit.

Komuna e Drenasit është në dijeni se stafi i QPD-së, edhe pse është në menaxhim të Ministrisë së Punëve të Brendshme, edhe përkundër përkushtimit e vullnetit  po bën përpjekje që t’u dalë ballë kërkesave të shtuara të bashkatdhetarëve të cilat gjatë muajve të verës shtohen por që me kapacitetet aktuale po e përballon me shumë vështirësi e vonesa fluksin e shtuar të kërkesave.

Për këtë arsye, kryetari Lladrovci, në respekt të kërkesave të shtuara të bashkatdhetarëve tanë, i ka bërë kërkesë zyrtare ministrit të Punëve të Brendshme, Ekrem Mustafa, që të marrë masat e nevojshme duke shtuar numrin e stafit, sidomos gjatë verës në mënyrë që bashkatdhetarët tanë në botën e jashtme të jenë në gjendje që të marrin shërbime cilësorë brenda një kohe të arsyeshme.