Më rastin e shënimit të dhjetë (10) vjetorit të shpalljes së Pavarësisë së Kosovës, në gjimnazin “Gjergj Kastrioti-Skënderbeu” është mbajtur programi për nder të festës, ndërsa të pranishëm ne këtë ngjarje ishin edhe kryetari i Komunës, Ramiz Lladrovci, ambasadorja e Finlandës në Kosovë, Pia Stjernvall, drejtori i Arsimit në Komunën Laukaa të Finlandës, Juha Tolonen, drejtoresha e gjimnazit Helina Patana, profesori i gjimnazit në Laukaa, Ilkka Linderos, drejtori i DKA-së, Tafil Halilaj, drejtori i gjimnazit, Valdet Istogu,KFOR-i finlandez, profesor dhe nxënës.

Në jubile të kësaj feste, në ambientet e shkollës është mbajtur një program kulturor-artistik të përgatitur nga nxënësit e shkollës, ndërsa ne nderim të mysafirëve finlandez është mbajtur edhe një koktej me ushqime tradicionale, ku edhe i janë ndarë dhurata e mirënjohje për bashkëpunimin qe ka gjimnazi i Drenasit me shkollat e Finlandës.

Pas këtij takimi, kryetari Lladrovci ka pritur në zyre drejtorin e Arsimit të Komunës Lauka, Juha Tolonen, drejtoreshën e gjimnazit Helina Patana dhe profesorin e gjimnazit të Laukaa-së, Ilkka Linderos të cilët edhe janë mysafir nderi të Komunës së Drenasit me rastin e shënimit të 10 vjetorit të Pavarësisë së Kosovës.

Gjatë këtij takimi është diskutuar për thellimin e bashkëpunimit mes dy vendeve. Kryetari Lladrovci ka thënë se ndihet krenar që janë pjesë e manifestimit të Pavarësisë. “Ne ishim ne organizmin e festës suaj për 100 vjetorit të Pavarësisë së Finlandës dhe kemi mësuar shumë nga kjo vizitë që edhe jemi duke shkëmbyer përvojat e Komunës suaj në Drenas. Historia e vendit tonë është duke u ndërtuar vetëm përmes një arsimimi sa më cilësor, prandaj bashkëpunimi në fushën e arsimit me Finlandën është një e arritur e madhe, kur dihen rezultatet e shkollimit tuaj, prandaj ne u jemi mirënjohës për këtë bashkëpunim”, ka thënë kryetari Lladrovci.

Ndërsa drejtori i Arsimit në Komunën e Laukka, Juha Tolonen, ka falënderuar kryetarin Lladrovci që i kanë ftuar ne festën e Pavarësisë së Kosovës dhe ka thënë se bashkëpunimi për shkëmbimin e përvojave nuk do të mungojë edhe ne të ardhmen.

Ne kuadër të bashkëpunimit të gjimnazit “Gjergj Kastrioti-Skënderbeu” dhe gjimnazit të Laukka, është duke u mbajtur mësimi online me profesor e nxënës nga të dy shkollat, ndërsa për vizita kanë qenë disa nxënës të Drenasit në shtetin e Finlandës, dhe nxënës të këtij shteti kanë qenë në Drenas.