Kryetari i Degës së PDK-së në Drenas, Ramiz Lladrovci, ka bërë me dije se numërimi i votave në Drenas ka përfunduar.

Ai ka thënë se si asnjë herë më parë, mbi 19 mijë vota i mori PDK në Drenas.

“Vota këto që dëshmuan fuqinë tonë elektorale në bastion, me kandidatët e njohur për qytetarët si dhe punën e palodhshme të Shtabit zgjedhor dhe nënshtabeve në terren. Me angazhimin e palodhshëm, dëshmuam se mundemi ma mirë dhe mundemi ma shumë. Dëshmuam se qytetarët tanë janë kampion nga komuna kampion. Nga 11 kandidatët e komunës tonë, presim që gjysma prej tyre të bëhen deputetët e ardhshëm. Ju uroj sukses dhe pres të japin kontribut për komunën e Drenasit”, ka shkruar Lladrovci në “Facebook”.

Ai ka thënë se zgjedhjet ishin të suksesshme, transparente dhe në pajtim me ligjin.

“Fushata kishte rrjedhë të qetë dhe konform të gjitha standardeve pa asnjë vërejtje as dënim. Të gjitha takimet, 44 prej tyre u zhvilluan me kohë dhe sipas planit, me pjesëmarrjen e rreth 10 mijë qytetarëve, për këtë i falënderoj të gjithë qytetarët, anëtarët dhe simpatizantët e PDK-së, anëtarët e Shtabit zgjedhor të degës, shefat e nënshtabeve dhe kandidatët për deputetë”, ka thënë ai.

Lladrovci ka thënë se është krenar me qytetarët e komunës së Drenasit dhe punën e shkëlqyer për zgjedhje të lira e demokratike.

“Përgëzoj qytetarë të Drenasit për fushatën dhe procesin e suksesshëm zgjedhor. Deputetëve të ardhshëm, ju uroj të jenë përfaqësues sa më meritor për bastionin e PDK-së, Drenasin, gjashtë herë kampion të qeverisjes së mirë! Kosova mundet ma mirë!”, ka shkruar Lladrovci.