Skuadra e Llapit me një këmbë është në finale të Kupës së Kosovës në futboll, pasi e ka fituar gjysmëfinalen e parë kundër Prishtinës me rezultat 2-3.

Të përzgjedhurit e trajnerit Tahir Batatina kanë qenë skuadër më e mirë në ndeshjen që u zhvillua sot në stadiumin “Fadil Vokrri” dhe me mërit kanë shënuar fitore.

Vetëm gjashtë minuta i kanë mjaftuar skuadrës së Llapit për të gjetur golin e parë në ndeshje, sulmuesi Ahmed Januzi e shfrytëzoi harkimin e Kastriot Selmani dhe mposhti portierin “bardhekaltër”.

Në minutën e 59-të, Januzi e dënoi për herë të dytë ish-skuadrën e tij duke shënuar për 0-2. Tre minuta me vonë, Kushtrim Shabani u përkujdes për 0-3. Prishtina realizoi për 1-3 me anë të Prapashticës, derisa në minutat shtesë Mërgim Pevqeli realizoi për rezultatin final 2-3. Ndeshja kthyese zhvillohen më 21 prill në stadiumin “Zahir Pajaziti” në Podujevë.

/Epoka e re/