Perëndimi po thur plane strategjike për të sulmuar Rusinë,  sipas një deklaratë të presidentit të Bjellorusisë, Aleksandër Lukashenko, gjatë ceremonisë së mbajtur në Pallatin e Pavarësisë të martën për të nderuar maturantët e shkollave ushtarake dhe oficerët e rangut të lartë, sipas medieve të huaja.

“Planet strategjike për të sulmuar Rusinë kanë qenë duke u zhvilluar prej disa kohësh. Presidenti i Federatës Ruse dhe unë diskutuam këtë çështje deri në detaje. Dhe sulmi do të ‘kalojë’ përmes Ukrainës dhe Bjellorusisë. Historia do të përsëritet”, ka thënë Lukashenko.

Agjencia shtetërore bjelloruse e lajmeve “BelTA” ka raportuar më herët se presidentët e Bjellorusisë dhe Rusisë kanë zhvilluar një bisedë telefonikë të hënën. Një nga temat kryesore gjatë bisedës ishte rruga për në rajonin e Kaliningradit.

Gjithashtu, dy presidentët kanë vazhduar diskutimin për mbrojtjen dhe sigurinë e dy vendeve në vazhdimin e negociatave që është zhvilluar në Shën Petersburg muajin e kaluar.