Veprimtari dhe ish-ushtar i UÇK-së në batalionin “Atlantiku”, Uk Lushi,  ka thënë se Daniel Serwer, profesor amerikan, kishte kundërshtuar mizorisht Albin Kurti dhe Shpend Ahmetin para disa vitesh në Amerikë.

“Daniel Serwer i pat kundërshtuar mizorisht Albin Kurtin dhe Shpend A. Ahmetin para disa vitesh në Amerikë kur këta dy patën paraqitjen e tyre të parë publike para audiencës amerikane. Idetë dhe pozicionet e Kurtit dhe Ahmetit ishin të mira. Fatkeqësisht ato u sulmuan edhe më pas nga Serwer dhe klani i tij. Serwer e pat sulmuar VV-në po aq pamëshirshëm edhe kur u bënë protestat te Dheu i Bardhë duke ndikuar negativisht në imazhin e Kurtit dhe VV-së në kuloaret dhe zyrat e Washington DC”, ka shkruar Lushi në “Facebook”.

Më tutje, Lushi ka kritikuar edhe qeverinë Kurti.

“Sot, pabesueshëm, Kurti po i lëpihet një Serweri që është një plak pa influencë dhe mbase edhe e paguan si po pagon shumë njerëz pa peshë, pa dije dhe pa rëndësi. Z. Kurti, Serwer është borë e parvjetme. Duhet qasje krejt tjetër në Amerikë dhe me politikën amerikane. Për korrektesë, nuk je krejt vetëm në këtë trullim, shumica e politikanëve në Prishtinë po vrapojnë pas personaliteteve që kanë bërë shumë për shqiptarët kur ishin në zenitin e tyre, por sot nuk munden sepse janë gati aspak relevantë”, ka shkruar Lushi.