Deputeti i Partisë Demokratike të Kosovës (PDK), Mërgim Lushtaku, ka thënë për “Ekonomia Online” se ekziston një moskoordinim ndërinstitucional sa i përket përgatitjes së draft-statutit të Asociacionit për ta dërguar në Gjykatën Kushtetuese.

Lushtaku ka përmendur letrën e kryediplomates Donika Gërvalla, e cila ia ka dërguar Asamblesë Parlamentare të Këshillit të Evropës, në të cilën është thënë se qeveria është duke përgatitur një draft-statut të Asociacionit për ta dërguar në Kushtetuese.

Ky fakt sipas Lushtakut shpërfaq një thyerje ndërmjet presidencës dhe qeverisë që është në “dëm të Kosovës”.

“E kemi parë edhe një papajtueshmëri e institucioneve, kemi parë edhe një deklaratë nga zyra e presidencës ku ka qortuar edhe vetë të paren e diplomacisë së Kosovës nga qeveria dhe këtu po tregon se ka një thyerje dhe moskoordinim në këtë pjesë dhe kjo nuk i bën mirë Kosovës”, ka thënë Lushtaku, duke shtuar se letra e Gërvallës është më shumë për politikë ditore.

Ai ka vlerësuar se është i nevojshëm bashkëpunimi, jo vetëm ndërmjet institucioneve, por edhe ndërmjet pozitës dhe opozitës.

“Kjo është e nevojshme që jo vetëm presidenca dhe qeveria të ketë një koordinim, por edhe opozitë dhe pozitë sepse është në interesin e Kosovës të jemi të anëtarësuar në çdo organizatë ndërkombëtare dhe sigurisht se kjo ishte një manovër sa për tu shfajësuar se ne kinse po mundohemi t’i plotësojmë kërkesat e BE-së, dhe konkretisht të partnerëve siç është Gjermania dhe Franca, por në realitet është vetëm sa për politikë ditore”, ka thënë ai.

Ndërsa, sa i përket anëtarësimit të Kosovës në Këshill të Evropës, Lushtaku, ka thënë se qeveria nuk i ka marrë me seriozitet kërkesat e Gjermanisë dhe Francës dhe në një mënyrë apo tjetër ka manipuluar me opinionin publik.

“Realisht ne nuk i gëzohemi këtij lajmi. Ne me shqetësim i kemi ndjek që nga fillimi. Ne e dimë shumë mirë që nuk është hera e parë që Kosova tenton të bëjë anëtarësimin dhe kjo është hera e dytë që ka kaluar në Parlamentin Evropian, ndërsa në Këshill të Ministrave nuk kalon për arsye se kemi kërkesa çfarë i kemi dhe deri më sot kemi parë se qeveria nuk i ka marrë përsipër me seriozitet bisedimet dhe kërkesat të anëtarëve kryesisht të Francës dhe Gjermanisë”.

“… në këtë pjesë dhe sigurisht ka manovruar dhe ka manipuluar me opinionin publik derisa ka ardhur deri në një banalitet ku qeveria ka deklaruar se po humb BE-ja se nuk po e anëtarëson Kosovën, ndërsa Kosova nuk po humb asgjë dhe kjo është shqetësuese është fyerje e inteligjencës së qytetarëve të Kosovës sepse e dimë shumë mirë së është e nevojshme edhe Kosova sikur në çdo organizatë ndërkombëtare të anëtarësohet edhe në këtë këshill dhe sigurisht se në këtë pjesë më shumë ndjej keqardhje sesa që ndjehem i gëzuar në këtë pjesë sepse Kosova ka nevojë të anëtarësohet sa më shpejt në organizata ndërkombëtare”, ka thënë Lushtaku.