Deputeti i PDK-së, Mërgim Lushtaku, është shprehur i lumtur për kalimin e Projektligjit për rimëkëmbje ekonomike në Komisionin për Buxhet dhe Transfere përgjatë ditës së sotme.

Në profilin e tij në “Facebook”, ai ka treguar edhe amandamentet e propozuara nga partia e tij, si forma plotësuese të Projektligjit për rimëkëmbje ekonomike.

Ai ka kritikuar qeverinë që iu deshën kaq shumë muaj të reflektoj mbi kërkesat e PDK-së, duke thënë se pa PDK-në asnjë proces nuk ec përpara.

Postimi i plotë i Lushtakut:

Lajm fantastik, kalimi i Projektligjit për Rimëkëmbje Ekonomike në Komisionin për Buxhet dhe Transfere.

Kërkesat e PDK-së të cilat janë propozuar përmes amandamenteve janë si në vijim:

– Pako prej 200 milionë eurove për bizneset.

– Mbështetje prej 300 eurove për tre muaj për punëtorët që kanë humbur vendet e tyre të punës për shkak të pandemisë.

– Rimbursimi i 10% të mjeteve të tërhequra nga Fondi Pensional i Kosovës, për të gjithë ata që kanë deri në 9.999.00 euro.

– Lirimi nga TVSh-ja për lëndën e parë e cila prodhohet nga veprimtaritë biznesore, pavarësisht a eksportohen jashtë vendit a jo.

Mëkat që Qeverisë i’u deshën kaq shumë muaj të reflektoj mbi kërkesat tona të cilat vetëm e kanë pasuruar dhe i kanë dhënë përmbajtje këtij projektligji por edhe i kanë dhënë zgjidhje konkrete problemeve të qytetarëve.

Ajo që vlen të theksohet është se PA PARTINË DEMOKRATIKE TË KOSOVËS asnjë proces nuk ec përpara dhe se është partia e vetme racionale në Kosovë që interesin qytetar e vendos mbi atë partiak.

Tani presim që ky projektligj të kaloj sa më shpejt në lexim të dytë në Kuvend.