Lëvizja Vetëvendosje (LV) ka përshëndetur votimin e Ligjit për përdorimin e gjuhëve në Maqedoni.

Sipas  LV-së, edhe pse ky nuk është zyrtarizim i gjuhës shqipe në Maqedoni, është një përparim sa i përket të drejtave të shqiptarëve.

“Ky ligj megjithatë ende e trajton shqipen si një gjuhë minoritare, të barabartë me gjuhët e tjera minoritare, romishten, turqishten, vllahishten etj. Kjo është diçka që duhet synuar të ndryshohet, pasi shqiptarët në Maqedoni nuk janë minoritet, por komb shtetformues autokton. Edhe pse sipas këtij ligji në banknota dhe në uniformat e ushtrisë e policisë nuk do të shkruhet shqip, votimi në kuvend përbën një hap përpara, krahasuar me kushtet e vështira dhe diskriminimin shtetëror me të cilin janë ballafaquar shqiptarët në vitet e fundit”, është thënë në komunikatën e Vetëvendosjes.

Lëvizja Vetëvendosje ka vlerësuar se mbetet shqetësuese qasja antishqiptare e VMRO-së, partisë më të madhe opozitare, e cila vazhdon rrugën e njëjtë që ndoqi kur ishte në qeverisje, duke synuar joshjen e segmenteve elektorale me prirje shoviniste kundër shqiptarëve.

“Kjo qasje ndjehet që prej bllokimit ë presidentit të Republikës, Ivanovit, i cili e ka kthyer këtë projektligj disa herë në Kuvend, e deri tek gjestet prej rrugaçi të Gruevskit”, është theksuar më tutje në këtë komunikatë.

Sipas Vetëvendosjes, votimi i Ligjit për përdorimin e gjuhëve është arritje e domosdoshme por e pamjaftueshme.

“Kryeministri Zaev kurrsesi nuk mund të thotë se tash e kreu detyrimin ndaj shqiptarëve, të cilët e mbështetën të vinte në pushtet. Shqiptarët kanë nevojë të marrin investime prej shtetit pa u diskriminuar, për shkolla më të mira e për vende pune. Ata kanë nevojë për infrastrukturë e pjesëmarrje të barabartë në institucione e administratë shtetërore. Mbi të gjitha kanë nevojë të ndalen ofendimet e kërcënimet ndaj tyre, si dhe diskriminimi në sistemin gjyqësor”, është thënë në vazhdimin e komunikatës së LV-së.

Vetëvendosje ka vlerësuar se 17 vjet vonesë nuk justifikohen me një arritje kaq të vogël.

“Miratimi i këtij ligji ishte dashur të ndodhte që prej gushtit 2001, si pasojë e Marrëveshjes së Ohrit. 17 vjet vonesë nuk justifikohen me një arritje kaq të vogël. Shkollat, punësimi, trajtimi, investimet, buxhetimi, respektimi i shqiptarëve në Maqedoni ende nuk është as për së afërmi në nivelin e Marrëveshjes së Ohrit e lëre më në ato se çka me të drejtë u takojnë shqiptarëve”, është theksuar në komunikatën e Vetëvendosjes.