Aleanca e Emmanuel Macron ka humbur shumicën absolute në Asamblenë Kombëtare të Francës vetëm dy muaj pasi ai u rizgjodh president, shkruan Euronews.

Në fund të raundit të dytë të zgjedhjeve të së dielës, kandidatët e Macronit fituan 245 vende përpara koalicionit të krahut të majtë Nupes dhe Rally Kombëtare të ekstremit të djathtë që bëri një përparim historik me 89 vende.

Kryeministrja Elisabeth Borne tha se situata “e paprecedentë” “është një rrezik për vendin tonë të përballur me sfida në nivel kombëtar si dhe në shkallë ndërkombëtare”. Borne, e cila u emërua në maj, do të përballet me një “mocion censure” nga opozita në fillim të korrikut dhe puna e saj nuk është e sigurt pasi ka arritur një fitore të ngushtë në zonën e saj elektorale.

Emmanuel Macron tani përballet me realitetet e një Asambleje Kombëtare me dy grupe armiqësore të opozitës, ndërsa ai përpiqet të shtyjë reforma të rëndësishme – duke përfshirë pensionet, uljen e taksave dhe rritjen e moshës së pensionit – dhe atij do t’i duhet një partner koalicioni për ta realizuar atë.

Reagimi i opozitës

Politikani veteran i krahut të majtë, Jean-Luc Mélenchon, ndërtoi një aleancë të partive socialiste dhe të gjelbra për ta sfiduar Macronin dhe përpjekjet e tij duket se kanë dhënë rezultat.

Dyqind kilometra larg Parisit, Marine Le Pen po mbante festën e saj. Kur u bë e qartë se ata kishin arritur 90 vende në Asamblenë Kombëtare, nga vetëm tetë më parë, mbështetësit brohoritën “Vive Marine” dhe “Macron jep dorëheqje!”